Minister-in 'Khuarel App' a tlangzarh

Mipuite'n khuarel chhiatna thleng sorkara an hriattir theihna tur leh khuarel chhiatna chungchang mipui hnena hriattirna tura duan 'Khuarel App' chu nimin khan Disaster Management & Rehabilitation (DMR) minister Prof. Lalnilawma'n Secretariat conference hall-ah a tlangzarh.

Khuarel App hi DMR department leh Buannel Geo Solutions & Services ten an buatsaih a ni a; mipuite'n khuarel chhiatna thleng sorkara an hriattir theihna tur leh, DMR department/DDMA aṭanga khuarel chhiatna chungchanga hriat tur pawimawh an puanzar theihna tura duan a ni.

Prof. Lalnilawma chuan, 'Khuarel App' chu khuarel chhiatna a thlen palha ṭangkai taka hman theih tur a nih thu a sawi a, "Mizoram tan thil chhinchhiah tlak tak a ni. Mizoram hi hmarchhak state zinga hetiang application changkang tak nei hmasa ber kan ni a, Khuarel App hi hmang ṭangkai ṭheuh turin Mizoram mipui ka ngen a ni," a ti.