Fate zirna ngaihsak lehzual turin Minister-in zirlai nu leh pate a chah

School Education minister Dr Vanlalthlana chuan, HSSLC Examination 2026-ah zirlai exam zinga 87.67% an hlawhtling chu a lawmpui thu a sawi a; nu leh pate chu an fate zirna ngaihsak deuh deuh tur leh Mizoram tana mi chhenfakawm chher chhuak tura theihtawp chhuah turin a ngên.

Dr Vanlalthlana hian nimina HSSLC 2026 result tihchhuah chungchangah thuchah a tichhuak a; exam hmachhawntu zirlai 12,243 zinga 87.67% an hlawhtling leh, kum hmasa aia pass percentage 6.57%-a a sang chu a lawm thu sawiin, "Kan ramah zirna ṭha a awm theih nan lungrual taka sorkar leh mipui kan ṭanho a ngai. Nu leh pate pawh an fate zirna ngaihsak deuh deuh tur leh Mizoram tana mi chhenfakawm chher chhuak tura theihtawp chhuah turin ka sawm a ni," a ti.

HSSLC 2026-ah sorkar sikula zirlai hlawhtling zat chu stream hrang hrangah 80% chung lam a ni vek tih sawiin Minister chuan, "Kum hmasa lama sorkar result neih dan thlirin, zirlai pass 80% an la pêl ngai lo a, kuminah stream tinah an pêl vek a, sorkar sikula zirtirtute leh zirlaite taimakna a lo lang hi a lawmawm tak zet," a ti a; sorkar sikula zirlaite leh zirtirtute a chhuan thu leh zirlai exam zawng zawng pass vekna sikulte a lawmpui thu a sawi.

Education Minister chuan, zirlai hlawhtlingte chu zirna kawng pêngṭhuam aṭangin an kal darh dawn tih sawiin, "Mi rilru puitlingte chu he hunah hian an danglamna a lang ṭhin. Kawng zawh tur thlanah leh dam chhunga hnathawh tur thlanah hun pawimawh lai a ni a, mahni kawng zawh tur ṭheuhah hlawhtlinna paw chhuak thei turin ṭan lak a ngai dawn," a ti a; zirlai hlawhtling lote chu beidawng loa nasa zawka ṭan la tur leh chhungkua leh ram tana hlawhtlinna sual chhuak ngei turin a fuih.

Dr Vanlalthlana chuan, HSSLC result tihchhuah a nih theihna tura thawktu MBSE-a thawk te, HSS zirtirtu te, zirlaite leh nu leh pa te, khawtlang hruaitute leh zirna kaihhnawiha thawktu zawng zawng chungah a lawm thu a sawi a; Mizoram zirnain hma a sawn zel theih nan theihtawp chhuah chhunzawm zel turin zirna kaihhnawiha thawktu zawng zawng a sáwm bawk.