Kum hmasa aiin pass zat an tam zawk a, pass percentage 6.57%-in a sang - MBSE Chairman

MBSE chairman JH Zoremthanga chuan, HSSLC Examination 2026-ah Science leh Commerce stream-ah zirlai hlawhchham vekna sikul a awm loh thu sawiin, a pumpuiah nikum aiin kuminah zirlai pass zat an tam zawk a, pass percentage 6.57%-a a san zawk thu a sawi.

JH Zoremthanga hian nimina HSSLC Examination 2026 result tihchhuah hnuah thuthar thehdarhtute'n an kawmnaah, Pathian hruaina leh thawktute thawhrimna vangin tluang takin HSSLC result tihchhuah theih a nih thu leh an lawm thu a sawi a ni.

MBSE Chairman chuan, "Kumin hian zirlai zawng zawngte pass vekna sikul Arts-ah 64, Science-ah 14 leh Commerce-ah 16 an awm a; zirlai fail vekna Arts-ah sikul pakhat awmin, Science leh Commerce-ah zirlai fail vekna sikul a awm lo. Zirlai exam zinga 87.67% an pass a, hei hi kum 2025-a pass percentage aiin 6.57%-in a sang zawk a, zirlai pass zat pawh nikum aiin 917-in an tam zawk," a ti.

JH Zoremthanga chuan, compartmental chance nei zirlai 115-te'n an zir leh zelna turah admission an tlai loh nan compartment exam buatsaih thuai tum a nih thu te, result sawisel duh nei tan result chhuah aṭanga ni sarih chhung complaint hun hawn a nih dawn thu te, National Education Policy 2020 zûlzuiin subject pakhatah chauh exam ṭhat (improvement) duh tan compartmental exam rualin exam theih a nih dawn thu te a sawi.

MBSE Chairman chuan, Board exam result buaipui leh tihchhuah kawngah an ṭanrual thu sawiin, "Kan Education Minister kaihhruaina hnuaiah Education department-in hma a sawn chho mek a, HSSLC result pawh a uapna hnuaiah hma takin kan ti chhuak thei," a ti a; centre superintendent leh invigilator te, Police department, Health department leh bank te pawhin an mawhphurhna ṭha taka an hlen thu a tarlang.

JH Zoremthanga chuan, centre superintendent leh invigilator ten inthununna an lekkawh ṭhat avang leh exam kaihhruainate an kenkawh ṭhat avangin exam laia naupang entawn hnawhchhuah ngai an awm loh thu a sawi bawk.

HSSLC 2026-a hlawhtling zawng zawng an lawmpui thu sawiin JH Zoremthanga chuan, "Duhsakna kan hlan a, hlawhtling ve lote pawh beidawng mai loa exam leh huna pass ngei tawh tura ṭhahnemngai taka zir tur leh bei fan fan turin kan chah a ni," a ti.