Pawl hrang hrangin zirlaite an lawmpui

Central YMA, MZP, Student Self-Support Union (SSU), MNYF leh National Students Union of India (NSUI) te chuan thuchhuah siamin, MBSE-in HSSLC 2026 result a tihchhuah avanga an lawm thu te, zirlai hlawhtlingte an lawmpui thu leh, hlawhtling lote beidawng loa zir zel tura an duh thu te an tarlang.

CYMA chuan, "HSSLC 2026-ah a pumpuiah 87.67%-in hlawhtlinna an chang hi lawmawm kan ti a, nikuma 81.10% aia kumina pass percentage a sang zawk hi hmasawnna ropui tak a ni a, pass zawng zawng kan lawmpui tak meuh a ni," an ti.

HSSLC-a zirlai hlawhtlingte an zir zelna turah theihtawp chhuah zel turin CYMA chuan duhsakna an hlan a; tun ṭuma hlawhtling ve rih lote pawh hnual lo a, theihtawp chhuah a bei zel turin an ngen bawk.

MZP chuan, "Kum liam ta aia pass percentage rawn sang hi lawmawm kan ti a... Zirlaite'n hetiang result ṭha an neih theih nana thawkrim ber zirtirtute kan fakin kan chhuang hle a ni," an ti a; HSSLC stream pathuma ti ṭha berte chu May 5, 2026-ah chawimawina hlan an tum thu an tarlang.

SSU chuan, kum 2025 aia kumina result a ṭha chu lawmawm an tih thu sawiin, "Zirlai, zirtirtu e leh zirlai nu leh pa te hei aia nasa lehzuala ṭan la turin kan ngen. HSSLC result ṭha tak kan neih theih nana theihtawpa beitu zirtirtute kan chhuang," an ti a; ram dang mite el phaka ṭan la lehzual turin zirlaite an chah bawk.