Ui sehah pemthar damdawi hnawih turin chah

National Rabies Control Programme (NRCP) chuan ui seh chungchanga hriattur an tichhuak a; uiin mi a seh chuan pemthar damdawi (betadine/dettol) hnawih tur leh thil dang hnawih loh turin mipui an chah.

NRCP chuan, ui seh chu rabies (ui â hri) kaina tam ber a nih avangin ngaihthah loh tur a nih thu an tarlang a, "Ui sehna pem chu uluk takin tui leh sahbawnin minute 15 chhung sil fai tur a ni a, pemthar damdawi (betadine/dettol) hnawih tur niin, thil dang hnawih loh tur a ni. Damdawi-inah anti-rabies vaccine (ARV) lak tur a ni a, course kima lak ngei tur a ni," an ti.

Ui vulhtute chu an ui vulhte khuahkhirh a, veterinary doctor aṭangin kum tin ARV laktir turin NRCP chuan an chah a; ui damlo - khawsik, chaw ei duh lo, chilthli tla duah duah, kawlh thut, zeng leh kaih te an awm chuan veterinary doctor hnenah entir/hriattir tur a nih thu an tarlang bawk.

NRCP THUCHHUAK - NAUPANG HRIAT TUR

* Hriat ngai loh ui khawih loh tur.

* Ui tlanchhia ûm zui loh tur a ni a, tlân thut loin muangchangin kalsan tur.

* Ui mitah chiang taka en loh tur; chona/vaunaah an ngai thei.

* Ring taka au vak vak hian ui a tiphâwklêk a, aw ki pangngaiin ṭawng tur.

* Mi ui khawih dawnin a neitute dil hmasak tur.

* Ui thil ei lai leh mu lai tihbuai loh tur.

* Uiin a zuan che chuan chî-âi loh tur a ni a, ngíl taka din a, che tam lo thei ang bera awmin, hmai leh nghawng bâwr kuta vên tur.

* Uiin a seh/ham chuan puitling hnenah hrilh vat tur.