Vawk hrisel finfiahna nei turin hriattir

Hnahthial district magistrate K Vanlalruati chuan, Hnahthial district-a vawk talh turte'n vawk hrisel ngei a ni tih finfiahna veterinary officer emaw, mahni khuaa VC/VFA emaw aṭangin neih ngei tur a nih thu a tarlang.

K Vanlalruati chuan, Hnahthial district-ah AH&Vety department emaw, mahni khuaa VC/VFA/VLTF on ASF te emaw phalna leh hriatpuina tel lo chuan mahni awmna khua emaw, khaw dang aṭangin emaw vawk/vawksa leh vawksa aṭanga thil siamte lakluh leh hralh khap a nih thu a tarlang a, "Tualchhung vawk talh tur reng rengin vawk hrisel ṭha ngei a ni tih finfiahna veterinary officer emaw, mahni khuaa VC/VFA hnen aṭangin emaw an nei ngei tur a ni," a ti.

Vawk damlo nei chu a rang thei ang bera District Veterinary Hospital emaw, VFA/VC te emaw hnenah hriattir tura chahin Magistrate chuan, "Vawk thi reng reng paih mai loin, disinfectant (chinai/ bleaching powder) nen thûk taka phûm tur a ni a, vawk neitute'n vawk damlo an hralh/talh tur a ni lo," a ti. Thupek zâwm lote chu BNS Section 223 hmanga hrem theih an nih thu a tarlang.