AMC sorkarin eirûkna lakah fihlim a tum; 'AMC ṭha zawk din turin hma kan la ang' - Aizawl Mayor (elected)

Aizawl Municipal Corporation (AMC) inthlan neih zawh taka sorkarna siam tur ZPM party-in Aizawl mayor tura an thlan H Lalremtluanga chuan, a kaihhruai AMC sorkar chu eirukna laka fihlim ngei an tum dawn thu a sawi a, "AMC ṭha zawk din turin hma kan la ang," a ti.

Vanglaini palai zawhna chhangin H Lalremtluanga chuan, mayor atana lak luh a nih huna a ngaih pawimawh hmasak tur chu an manifesto ti hlawhtling tura hmalak a nih dawn thu a sawi a, "Manifesto-ah thil tam tak kan tarlang a, Aizawl thar, AMC thar siam ngei turin theihtawpin hma kan la ang. State sorkar nena thawhho ngaihna tam tak AMC-in subject kan neih chinah a awm a, water related, santitation leh a dang dangahte pawh. Tun hmain state sorkar nena thawhhona a ṭha tawk ngai lo," tiin, state sorkar nen ṭha taka an thawhho tur thu a sawi.

H Lalremtluanga chuan, mi ṭhenkhatin 'AMC-in hna an timuang' an tih ṭhin chu siamṭha turin theihtawp an chhuah dawn thu a sawi a, "Licence leh permit pek chhuaha kan muan ṭhinna pakhat, technical person ni deuh ṭhina hriat chu training ṭha leh zual pein chinfel dan tur kan ngaihtuah dawn a, a ṭul angin chak zawka AMC-in hma a lak theihna atan thawktu lakah pawh hmalak tum a ni. AMC-in sawiselna a tawhna ṭhin hrang hrangte a reh theihna atan theihtawp chhuah kan tum," a ti.

Hlemhlêtna lakah fihlim ngei an tum tih sawiin H Lalremtluanga chuan, "Ram rorelnaah Pathian ram tun din kan aupui a, chumi anga kal tur chuan eirukna leh hlemhletnain hmun a chan a thiang lo; hemi kawngah hi chuan kan fihlim ang," a ti a; AMC kaihhruainaah a thawhpui turte chu tawnhriat nei ṭha, eptu ni chunga hnathawh kawng hmingṭha thei leh mi ṭha tak tak an nih thu a sawi.