EMRS 11-a zirlai hmeichhiate'n invenna atana taekowndo an zirna tur hawn a ni

Eklavaya Model Residential School (EMRS) zirlai hmeichhiate tana taekwondo hmanga mahni inven dan zirna, 'Self Defense Training in Taekwondo for EMRS School Girls' chu nimin khan Planning conference hall-ah hawn a ni.

Training hi Social Welfare, Women & Child Development department, Planning & Programme Implementation department, EMRS Society leh Mizoram Amateur Taekwondo Association (MATA) thawhhona hnuaia kalpui tur a ni a; National Society for Tribal Students (NESTS), Ministry of Tribal Affairs-in a ngen angin Beti Bachao Beti Padhao (BBBP) scheme Women & Child Development department aṭangin senso tur hmuh a ni.

Mizorama EMRS 11 - Lunglei, Serchhip, Lawngtlai, Ngopa, Tuipang, Chawngte, Tlangnuam, Tlungvel, Zawlnuam, Bil-khawthlir leh Noaohtlah-ah te pawl 6-12 zirlai hmeichhia 1,819-te tan taekwondo training buatsaih a ni dawn a; MATA-in taekwondo zirtirtu (trainer) an tum dawn a ni.

Training hawnna inkhawm hi Social Welfare secretary Lalzarmawii'n a kaihruai a; WCD director Zoramthangi Chhangte-in thu sawiin, "BBBP hnuaiah hmeichhe naupang hmasawnna turin mahni invenna pek ngaih pawimawh a ni a, hmeichhe naupangte'n mahni inringtâwk taka an inven theih chuan khawtlang a him mai ni loin, intluktlanna kawngah hmasawnna a ni thei," a ti.

Planning additional secretary Dr Lal-rinchhana, MATA hruaitute leh Mizoram EMRS Society hotute'n thu an sawi bawk.