Remna duhtu CM kan nei - Home Minister

HPC-D (LF)-te'n nimina an ralthuam an tunna inkhawm CTI, Sesawnga neihah Home minister K Sapdanga chuan, Mizoramin remna duhtu Chief Minister a neih thu a sawi.

Home Minister chuan, HPC-D(LF)-te'n inremna neia silai an tung chu Pathian hnathawh a nih thu a sawi a, "Pathian ropui ber se. A dawt lehah chuan remna duhtu ram hruaitu Chief Minister kan neih vang a ni. Kan CM hi all India level-a sorkar hna zahawm tham tak kalsan a, Mizoram buai a reh theihna tura mahni inhâl ral, Mizo mipuite'n remna leh muanna kan neih theihna tura hrehawm tinreng paltlang tawh a ni," a ti.

K Sapdanga chuan, Lalduhoma kaihhruaina leh rilru sukthlek zâwng a nih avangin Mizoram sorkar leh HPC-D(LF) ten inremna kawng an zawhho thei tih sawiin, "Kan CM hi symbol of peace tia koh ngam a ni. Mizoram sorkar leh Mizoram mipui aiawhin lawmthu ka hlan," a ti, remna kawng zawnga chhun zan zawma thawktu te, adviser to CM (political) Lalmuanpuia Punte leh police officer leh Home department-a officer-te thawhrimna avangin inremna a awm thu a sawi.

Hmasawnna ṭha zawk duh vanga ralthuam nen feh chhuak turin huaisen a ngai tih sawiin Sapdanga chuan, "Kan unau lo haw tate hian ram leh mipuite in hmangaih avangin ralthuam puin ramhnuaiah hrehawm tinreng in lo tuar tawh a, kan hriatpui che u. In feh chhuah chhan tam tak a la hlawhtling lo ang a, laklawh pawh in la inti hle ang tih kan ring. Hmasawnna ṭha zawk nei tur hian ralmuang tak leh inring tawna sorkar nen thawhho hi a ṭha zawk tih pawma lo pen chhuakte kan lo lawm a che u," a ti.

Home Minister chuan, ralthuam hial lek a ngaih chhan nia HPC-D (LF)-te'n an hriat, hmasawnna chu tihlawhtling turin lungmuang tak leh lungrual taka an thawhho a beisei thu sawiin, "In kawng in zawh tawp ta a ni lo a, kha kawng in lo zawh chhan kha tihlawhtling turin, nangmahni chauha thawk loin, state sorkar nen kan thawkho ṭan thei dawn ta tihna zawk a ni," a ti a; sorkarin hmasawnna hna thawk tura lungrual taka bul an ṭanho theih a beisei thu a sawi.