2025-26 chhungin Lunglei dist-ah HIV vei mi 105 hmuh chhuah a ni

Sorkar kum liam ta 2025-26 chhung khan Lunglei district-ah HIV vei mi 105 hmuh chhuah a ni a, chu'ng zinga 66.67% chu mipat hmeichhiatna hman aṭanga kai an ni.

Lunglei District AIDS Prevention & Control Committee hotute April 29, Nilainia Lunglei additional DC Rochuangkimi Khenglawt hoa an ṭhutkhawmnaa tarlan danin, April 2025 - March 2026 chhungin Lunglei district-ah HIV vei mi 105 hmuh chhuah an ni a, mipa 67 leh hmeichhia 38 an ni. Hmeichhia 38 zinga paruk chu hmuh chhuah an nih laia nau pai an ni.

HIV vei hmuh thar mi 108 zinga 66.67% chu mipat hmeichhiatna hman aṭanga kai an ni a; inchiuna hriau aṭanga kai 31.31% leh nu aṭanga fatea kai chhâwng (vertical transmission) 2.02% an awm. HIV vei hmuh thar zinga 84.85% chu kum 15-49 inkar an ni.

Ṭhutkhawmah hian, HIV/AIDS darh zel tur vênna atana hmalak dan tur rel a ni a; Red Ribbon Club awmna college pasarihah HIV/AIDS chungchang inzirtirna leh endikna (awareness campaign & screening) buatsaih ni se, an ti. Sorkar pisa a tam thei ang berah HIV test huaihawt an rêl a; May 2026-a Healthy Lunglei District Campaign neih turah HIV endik telh ve ni se, an ti bawk.