SEC-ah AMC inthlanpui thlir let a ni; Commissioner-in MCC hlih thu a puang
Nimin chawhma dar 11 khan khan state election commissioner Dr H Lalthlangliana kaihhruaiin a pisaah Aizawl Municipal Corpo-ration inthlanpui thlir letna hun hman a ni a, AMC inthlan vanga Model Code of Conduct puan chu nimin chawhma dar 11 khan hlih a nih thu Commis-sioner chuan a puang.
AMC inthlan thlir letnaah hian State Election Commission (SEC) hotu te, political party aiawh te, Mizoram People Forum hruaitu te, MJA hruaitute leh IPR officer te an tel a; ṭha an tih lai te, ṭha tawk lo leh felfai tawk lo, insiamṭhat ngaihna laite sawi chhuah a ni.
Dr H Lalthlangliana chuan, AMC inthlanpui boruak muanawm tak hnuaia zawh a nih avang leh tluang taka result chhiar a ni chu lawmawm a tih thu sawiin, MPF leh political party ten ṭha taka an thawhpui vang te, inthlan kaihhnawiha mawhphurhna nei sorkar hnathawk zawng zawngte'n an mawhphurhna ṭha taka an hlen avangin a lawm thu a sawi. AMC term inṭanna chu sorkar lak luh aṭanga inṭan a nih thu a sawi bawk.
Commissioner chuan, AMC inthlan hmasa lama la tih ngai loh, tun inthlanpuia tihte a sawi a; chung zingah chuan home voting te, inthlana duty - Persons with Election Duty (PED)-te'n SEC office-a vote an thlak te a tel.
SEC Commissioner sawi danin, AMC inthlan vuakvetah sorkar department aṭangin MCC bawhchhiatna vawi hnih a awm a, chinfel ve ve a ni. Political party aṭangin MCC bawhchhiaa inpuhna report paruk a lut a, mahse, chhui chian hnuah finfiahna mumal a awm loh avangin thu tling loa ngaih vek a ni.