KHAWTHLIR

Ṭanpuina hlan

Baptist Church of Mizoram (BCM)-a RD department chuan tun hnaia thli tleh vanga khuarel chhiatna tuartu Chhipphir khuaa chhungkaw 25 hnenah April 29, Nilaini khan Rs 1,23,000 leh silpauline an sem a; Chhipphir YMA hnatlang senso atan Rs 5,000 an hlan bawk.

Heroin man

Assam Rifles leh Champhai police te chuan April 28, 2026 khan Champhai Zote huam chhungah mi pakhat hnen aṭangin heroin gram 32.8 an man a, Champhaia Excise & Narcotics department hnenah an hlan.

District Jail tlawh

Kolasib district bawrhsap H Dolianbuaia chuan April 29, Nilaini khan Kolasib District Jail a tlawh a; jail jail dinhmun a enfiah bakah, enkawltute leh tángte a kâwm. Kolasib District Jail-ah hian táng 93 an awm mek a, hmeichhia pariat an tel. SASCI project hnuaiah Kolasib District Jail tihzauh hna leh hmeichhe tángte awmna tur thar sak hna thawh mek a ni.

Ram dilna pawm

Serchhip District Headquarters Land Committee chu district bawrhsap Paul L Khuma kaihhruaiin nimin khan an ṭhukhawm. New Serchhip North, New Serchhip South, Chanmari, P&E Veng, Vengchung leh Dinthar Serchhip village council chhunga ram pass dilna 12 chungchang ngaihtuahin, dilna 11 an pawm a, dilna pakhat chu Serchhip Town Planning huam chhunga awm a nih avangin hnâwl a ni.

Riverine Awareness Campaign buatsaih

Lunglei District Fisheries Development office chuan nimin khan Mizoram District Transformation Programme hnuaia District Catalytic Fund (Handholding) kaltlangin JB College multipurpose hall-ah 'Riverine Awareness Campaign' an buatsaih. Lunglei RD Block chhunga YMA hruaitu te, VC leh LC member te, District Riverine Conservation Board member te, JB College hotute leh zirlai te, Seventhday Adventist School zirlai naupangte an tel a ni.