HOTS question telh tam deuh deuh kan tum - MBSE Chairman

Mizoram Board of School Education (MBSE) chairman JH Zoremthanga chuan, Higher Secondary School Leaving Certifcate (HSSLC) exam question-ah HOTS zawhna telh tam deuh deuh an tum thu a sawi.

HSSLC 2026 result April 29-a tihchhuah zawha thuthar thehdarhtute'n an kawmnaah MBSE Chairman chuan, nikum aiin kuminah stream tinah pass percentage a san zawk thu a sawi a, "Zawhnate hi LOTS aṭangin 50-60% siam a ni a, a bak 40-50% chu application leh HOTS aṭanga siam a ni thung. Zirnain hma a sawn zel theih nan HOTS question hi telh tam deuh deuh tura ruahman a ni," a ti.

JH Zoremthanga chuan, result bua top 10 tarlan loh chungchang sawi nawnin, "Hei hi CBSE leh CISCE leh board lian deuhte kalphung a ni a, NEP 2020-in kaihruaina a siam credit system leh grading system kalpui tura hmalak lâwkna a ni," a ti a; admission an tlai lohna turin compartment exam buatsaih thuai an tum thu a sawi.

MBSE Chairman chuan, Education minister Dr Vanlalthlana hruaina hnuaiah Education department-in hma a sawn mek thu sawiin, "HSSLC result hi a uapna hnuaiah hma takin kan tichhuak thei a ni. HSSLC exam tluang taka kan zo thei leh ruahman lâwk anga result kan chhuah theihna hi HSS zirtirtute inpekna leh ṭhahnemngaihna vang a ni a, question set, evaluation, scrutiny, tabulation-ahte an tih tur ṭha taka an hlen chhuah vang a ni. Education department pumpui kan ṭangrual em em," a ti.