Nupui pasal nei hma tura infuih a ṭul - B Lalchhanzova

Minister of state B Lalchhanzova chuan April 29, Nilaini zan khan Lal Hrangchhuana Rûn, NE Khawdungseiah YMA Sub-Headquarters, Saitual inkhawmpui vawi 3-na a hmanpui a; nupui pasal innei hma tura infuih thar a ṭul thu a sawi.

B Lalchhanzova chuan, inthlah pun a pawimawh thu sawiin, "Hnam anga kan ropuina kan chhawm nun zel theih nan pun chak kan mamawh a, nupui pasal innei hma tura infuih thar a ṭul. Ṭhalaite'n kan taksa hi ruihhlo bâwih atan pe lo ila, mahni inkhawngaihna dahṭhain, hma lam i pan zel ang u," a ti.

YMA chu Mizo hnam phuar khawmtu leh hnam lungphûm pawimawh a nih thu sawiin B Lalchhanzova chuan, "YMA chuan ramngaw, nungcha leh lui humhalh kawngah pawh hma lain, khawtlang nuna thil ṭha lo, ruihhlo leh eirûkna do kawngah pawh theihtawp an chhuah ṭhin," a ti a; YMA nihna chhawm nung zel turin member-te a chah.

YMA Sub-Headquarters Saitual inkhawmpui hi April 28-30, 2026 chhung awh tur a ni a, thupui chu 'Ruihhlo do' tih a ni. Vantlang inkhawm, rorel, hruaitu inthlan leh cultural programme te an hmang a; ruihhlo donaa ti ṭha leh ramngaw leh nungcha humhalh kawnga ti ṭha YMA branch-te hnenah lawmman hlan a ni.