Gas leh buhfai bûk dik sorkar thupui - FCSCA Minister

Food, Civil Supplies & Consumer Affairs (FCSCA) minister B Lalchhanzova chuan April 30, Ningani khan Teikhangah Supply kudam sak thar a hawng a; gas leh buhfai bûk dik tak sem chu sorkar thupui a nih thu a sawi.

Kudam hawn inkhawm hi Teikhang community hall-ah buatsaih a ni a; FCSCA Minister chuan, gas leh buhfai bûk dik tak sem chu sorkar thupui a nih thu sawiin, "Mipui pawhin hruaitu dik an duh chuan dik taka thil tih ve hi an mawhphurhna a ni," a ti.

FCSCA department hotute thawhrimna zarah kudam hawn theih a nih thu sawiin B Lalchhanzova, "Teikhang leh a chheh-vela mipuite'n an chhawr ngei ka beisei," a ti a, khawtlang hruaitute ngennate theihtawpa bawhzui a tum thu a sawi.

B Lalchhanzova chuan, hmasawnna rualkhai tak nei tur chuan khawpui leh thingtlangah hmasawnna a kal kawp a ngaih thu a sawi a; an dikna chanvo hria a, huaisen taka hma lam pana pên turin kal khawmte a fuih bawk.

Supply kudam hawn inkhawm hi Saitual district civil supply officer Zairemkima'n a kaihruai a, FCSCA director Saizikpuii Sailo leh Teikhang VC president Biakkima te pawhin thu an sawi a ni.