KHAWTHLIR

KṬP-in thisen pe

KṬP, Zemabawk Vengthar Branch chuan nimin khan thisen pek an huaihawt a, Synod Hospital Blood Centre tan thisen unit 17 an pe.

MLA-in tlawh

Hrangturzo bialtu MLA Lalmuanpuia Punte chuan nimin khan a bial chhung Bungtlang khuaa tun hnaia thli tleh vanga chhiatna tâwkte a tlawh. Bungtlangah hian thli tleh vanga in chhe vek pakhat leh thawm ṭhat ngai khawpa chhia eng emaw zat a awm a ni. Bialtu MLA hian sorkar aṭanga ṭanpuina awm theite ngaihtuahpuiin, a rang thei ang bera chhawmdawlna an hmuh theih nan hma a lakpui a ni.

Police-in beer man

Bairabi Police Checkgate-a duty-te chuan April 30, Ningani khan Bolero pick-up AS-11 FC-2898 aṭangin beer (Kingfisher) bûr 840 an man. Beer phurhna lirthei khalhtu Ajmol Hussain Borbhuiya (27), Hailakandi district, Assam pawh an man nghal a ni.

Heroin man

Assam Rifles leh Excise & Narcotics department chuan nimin khan Ramthar North, Aizawlah mi pali hnen aṭangin heroin gram 397 an man. Assam Rifles hian April 30, Ningani khan Zokhawtharah mi pakhat hnen aṭangin heroin gram 23 an man bawk.

Home/centre tlawh

Mizoram State Commission for Women chairperson C Zodinpuii chuan April 30, Ningani khan Aizawla hmeichhiate enkawlna, drug rehabilitation centre-te a enfiah a; MSCW member secretary Flora Laltanpuii, member Lalṭanpuii Pachuau, Lalchhuanmawii leh Dr Hmingthanzuali ten an ṭawiawm. TNT, Muanna Venga hmeichhia enkawlna te, New Life Home Society enkawl Jeriko Khualbuk leh, Synod Social Front enkawl Synod Rescue Home te an tlawh a ni.

VC by-election

State Election Commision chuan April 30, 2026 khan Mara Autonomous District Council chhunga village council parukah by-election a buatsaih a, vote thlak zawhah vote chhiar nghal a ni. VC member pahnih thlanna Meisavaih East-ah BJP leh ZPM pakhat ve ve, member pakhat thlanna VC panga - Thosai-ah Independent, College Vaih II-ah BJP, Noaotlah III-ah BJP, Tipa V-III ah ZPM leh Khaikhy-ah BJP thlan tlin a ni.