AICC Talent Hunt-a tel turin Mizote sáwm

All India Congress Committee (AICC) national spokesperson Ritu Choudhary chuan, AICC-in India ram pum huapin spokesperson, research coordinator leh publicity coordinator tur zawnna 'National Talent Hunt' an buatsaih dawn thu a sawi a, tel turin Mizo ṭhalaite a sâwm.

Ritu Choudhary hian nimin khan Aizawl Press Club-ah thuthar thehdarhtute a kâwm a; India rama mipui rorelna (democracy) leh constitutional spirit-te rahbehin a awm mek niin a sawi a, “Rahul Gandhi leh Pawan Khera te pawhin harsatna tam tak an tawh phah mek," a ti.

AICC Spokesperson chuan constitution-in zalen taka ngaihdan sawi theihna mi tin a pek hi humhim turin Congress party chuan hma a la dawn tih sawiin, "Tunah hian state tinah Congress party chuan democracy chawi nun nan National Talent Hunt buatsaihin, national level-a spokesperson, research coordinator leh publicity coordinator tur a zawng dawn a ni,” a ti.

National Talent Hunt-ah hian tel tura Mizoram ṭhalaite sáwmin Ritu Choudhary chuan, "Talent Hunt kaltlanga thlan chhuah ṭhalaite tan AICC chuan national level platform pein, India rama democracy a nun chhoh zel theih nan au chhuahna hun pek an ni dawn," a ti a; state tin aṭanga thlan chhuahte'n an state ai an awh dawn thu a sawi.