Siaha MLA-in WADA centre a tlawh

Siaha bialtu MLA Dr K Beichhua chuan nimin khan Mizoram State Aids Control Society (MSACS) enkawlna hnuaia awm, Women Anti-Drug Association (WADA) Drop-in Centre, Siaha a tlawh a, thawktute nen an harsatna hrang hrang chinfel dan tur an sawiho.

WADA Drop-in Centre hi ruihhlo ngaite enkawlna hmun niin, an hnuaiah hian ruihhlo ngai 700 chuang an awm mek a, chu'ng zinga mi 100 chuang chu HIV vei an ni.

WADA Centre-a thawktute chuan, ruihhlo ngai an enkawl mekte chu Hepatitis leh natna dang an vei leh vei loh enfiah ngaite an nih hlawm thu sawiin, "A test-na man a sang em em a, test-na tur sensoah harsatna kan tâwk ṭhin," an ti.

Dr Beichhua chuan, WADA-a thawktute'n harsatna an sawite chu state pum harsatna a nih thu sawiin, "Aizawl ka thlen veleh a sutkian dan ngaihtuahpui turin Health Minister hmuh nghal ka tum," a ti a; Centre mamawh wall-fan leisak a tum thu a sawi bawk.