MNF-in CAA an thlàwp leh thlàwp loh tichiang turin ZPM-in phût

Zoram People's Movement (ZPM) general secretary-te chuan nimin khan secretary general K Sapdanga hoin Aizawl Press Club-ah thuthar thehdarhtute an kâwm a; MNF chu Citizenship Amendment Act, 2019 (CAA) an thláwp nge thláwp lo tichiang turin an phût.

K Sapdanga chuan, ram pumah CAA dotu leh thláwptu na taka an inep laiin MNF sorkarin CAA an thláwp nge an do tih mipuite'n hriat an duh thu sawiin, "Lok Sabha-ah an MP chu CAB thlâwp thu sawi turin hun pek a ni a, a thláwp ta ngei a. Chief Minister leh MNF party hotute'n MP hi CAB thláwp tura an tih thu an puang. Chutih laiin, Aizawla CAB dodalna total bandh-ah MNF party elected OB ṭhenkhat leh minister ṭhenkhat chu bandh duty-in an hnatlang ve a, bandh huaihawttute ṭanpuina pawisate an pe a ni," a ti.

MNF office aṭangin CAA dotute demna thu uar taka thehdarh páwl an awm reng tih sawiin Sapdanga chuan, "Tun hnaiah MNF hotu an insîksâwi a, party chhungkuain harsatna an tawh mek avangin CAA do páwl leh thláwp páwl an awm a ni mai thei. Ruling party ber tun ang huna a ṭan lam chiang lo a, tuilairapa a awm hi a fel lo," a ti a; MNF chu CAA an do nge an thláwp tichiang turin an phut thu a sawi.

ZPM Secretary General chuan, CAA chu hnuhkîr a nih loh emaw, India puma Kristian leh hnam tlem zawkte tana him tura siamṭhat a nih loh emaw chuan ZPM-in an theih ang anga an do zel dawn thu sawiin, "Mizo ṭhalaite leh zirlaite'n an theih dan ang anga CAA an dodal hi kan fak a, kan thláwp. Tharum thawhna engmah awm si lo, CAA dodaltute sorkarin police hmanga kut a thlak a, a man ringawt kha kan dem tak zet. BJP sorkarna state ni loah chuan CAA dodaltute'n sorkar kut an tawrhna state awmchhun kan ni âwm e, a zahthlak a ni," a ti.

K Sapdanga chuan, CM Zoram­thanga'n CAA chu Mizo­rama kohhran, NGO leh political party zawng zawngin Mizoram huamtir tura an dil anga pass ta ni àwm takin a sawi tih sawiin, "Amah pawhin a awih hauh loh tur, chawp leh chilha a dik lohzia finfiah theih, phuahchawpa a sawi chiam mai hi ram khat hotu lu ber tih àwmah kan ngai lo. Kohhran, NGO, party leh Mizo mipuite hnenah phuahchawp thu a sawi vangin thuphá cháwi turin kan phût," a ti a; Amit Shah-a'n political party leh NGO-te a koh ṭumin ZPM chuan CAB an duh loh thu chiang taka an thlen thu a sawi.

NGO Coordination Commi­ttee-te'n CAA chu political party tumahin politics-a hamṭhatna atan hmang lo tura an ngenna zahawm an tih thu sawiin Sapdanga chuan, "Hetih lai hian, India ram hmun tinah thisen chhuaka nunna thàpa dodalna a nasat telh telh avangin, kan Joint NGO-te pawh pên chhuak a, lungrual taka CAA dodal thei tura hma hruai turin kan ngen a ni," a ti.

K Sapdanga chuan, National Council of Churches in India (NCCI) meuhin CAA na taka sawiselin, sakhaw behchhana khua leh tui nihna dan CAA chu an dodal tih sawiin, "Kristian percentage sanna ber pawl Mizo­­rama kan state sorkarin a thláwp tlat thu ṭhahnemngai taka an puangzar hi pawi kan ti tak zet. Amit Shah-a'n 'Eng pawh thleng se CAA hi hman a ni ang' tiin a puang nawn leh tawh," a ti a; Amit Shah thusawi chu, 'CAA pawm thei ngang lo chu India ram aṭangin lo inla hrang mai rawh se' tihna a ni em tih chu an zawhna a nih thu a sawi. 

Kumina Lok Sabha in­thlanah, Parliament-a CAB dodal tak tak tur MP thlan a ṭul an tih avang leh BJP ep ngam tur candidate neih ṭul an tih êm avangin pawl dangte nen mipui candidate an siam thu sawiin Sapdanga chuan, "Tuna CAA chungchanga kan boruak tawn hian, MP inthlan laia rálkhèl dár kan vuak chhan a rawn lang chiang taah kan ngai. BJP sorkarin India ramah Uniform Civil Code bill kum 2020-a put luh a tum thu a lo puan tawh pawh hi sût ngei turin kan ngen lâwk a ni. UCC hi pass a nih palh chuan, CAA dodalna aiin a let za tam takin dodal a ni dawn tih kan sawi lâwk duh," a ti. 

ZPM general secretary Lal­muanpuia Punte sawi danin, CAB chungchangah Mizoram sorkarin political party leh NGO-te nena sawihona hun a buatsaih lo a, sorkar lai MNF party high command-ah pawh sawiho a ni loa hriat a ni.