KHAWTHLIR

Nimin khan Aizawl Civil Hospital-ah mi 23-in Krismas pualin thisen an pe. AVBD leh blood bank-te'n Krismas puala a bik taka thisen pek hun an buatsaihah nimin thleng khan mi 185-in thisen an pe tawh a ni.

Leng khuain Health Security an siam chu nimin khan Dr Lalbiakzuala'n a hawng. Leng khua hian kumin September 23 khan Health Security Society an din a, Society chuan an khaw mite tan kum khat chhungin damdawia inenkawlna senso Rs. 20,000 thleng an hmuh let theih dan tur an siam a, sumte chu an khuaa sorkar hnathawk te, V/C, Leng Development Committee leh khawtlang mipuite thawh khawm a ni. He scheme hi January 1, 2020-ah hman ṭan a ni ang.

Aizawl Municipal Corporation (AMC) Ward no. XIV bialtu councillor Lalhmingmawia chuan a bial chhunga chhungkaw 150 hnenah Krismas thipek atan buhfai ip khat ṭheuh a pe.

Champhai South bialtu MLA TJ Lalnun­tluanga, minister of state chuan nimin khan a biala Chhungte, Champhai Jail Veng, Electric Veng, Zion Veng, Tlangsam Mualveng leh Ruantlang YMA hruaitute hnenah MLA fund hmanga lei, damlo mamawhte hman turin oxygen concentrator a hlan a, vawiinah veng pali hnenah a pe leh ang. 

Serchhip District Magistrate chuan  Cr.PC Section 144 tlawhchhanin thla hnih chhung atan Serchhip district-ah hmun dang aṭanga vawk lak luh a khap. Thupek zâwm lote chu IPC Section 188 hmangin hrem theih an ni a, thupek hian sorkar aṭanga phalna neite a huam lo.