Bawlhhlawh sawngbawlna hman ṭan a ni Aizawl mipuiin bawlhhlawh an thliar mumal lo

Aizawl khawpuia bawlh­hlawhte sawngbawlna tura siam thar, Aizawl Solid Waste Management Centre, Tuirial chu December 11, 2019-a hawn a nih hnuah Aizawl Muni­cipal Corporation (AMC) chuan veng thlan bik 19-a bawlhhlawhte December 13 aṭangin an paih ṭan. Hetih lai hian, bawlhhlawh neitu/paihtu chhungkua zingah ṭawih thei leh ṭawih thei lo thliar mumal lo an tam avangin harsatna an tâwk.

AMC hotute'n Vanglaini palai an hrilh danin, Aizawl Solid Waste Management Centre hi UDPA department hnuaia project khawih ṭhin SIPMIU, Aizawlin an siam a ni a, siam zawh a nih hnuah December 11 khan deputy chief minister Tawnluia’n a hawng. Enchhin a nih hnuah December 13 aṭangin bawlhhlawh paih/dah luh ṭan a ni a, mahse, Aizawl khawpui pumpuia bawlhhlawhte dah lut nghal loin, local council thlan bik 19-a bawlhhlawhte paih ṭan a ni.

Aizawla veng 19-a bawlh­hlawh, Aizawl Solid Waste Management Centre-a paihte chu tun dinhmunah chuan mipui/chhungkuate'n a ṭawih thei leh ṭawih thei lo an thliar ṭha tâwk lo hle tih AMC hotute chuan Vanglaini an hrilh a, "Tuna sâwngbâwl tura thleng thlate hian duhthu a sâm lo hle a, Centre-ah lo thliar leh vek tho a ngaih avangin hna a timuang hle a ni," an ti. 

AMC hotute chuan, Aizawl mipuite chu an bawlh­hlawh, a ṭawih thei leh ṭawih thei lote uluk leh fimkhur zawka thliar turin an ngen a; veng 19-a local council-te a ṭul anga an veng ṭheuha hma la tura hriattir an nih tawh thu an sawi. Aizawl Solid Waste Management Centre hi kum hnih chhung SIPMIU-in an enkawl phawt ang a, chumi hnuah AMC kutah an hlan dawn niin AMC hotute chuan an sawi bawk.