KHAWTHLIR

Thisen pe

May 2, Inrinni khan Kohhran Thianghlim ṭhalai pawl (YEF) South Group chuan Civil Hospital, Aizawl Blood Bank-ah thisen unit 115 an pe a, petute mipa 94 leh hmeichhia 21 an ni. KṬP, Nursery Bial pawhin Synod Hospital tan thisen unit 57 an pe a, petute mipa 50 leh hmeichhia pasarih an ni.

BKHP Day hmang

Baptist Kohhran Hmeichhe Pawl (BKHP) te chuan May 2, Inrinni khan BKHP din champha vawi 88-na pualin hun an hmang. Kumina BKHP Day thupui chu 'Lungawina kim Isua' tih a ni a; unit tam ber chuan khawtlang tana thil ṭha tihna atan hmangin, khawlaite an tifai a, zanah an inkhawm a ni.

AR-in meth man

Assam Rifles sipaite chuan May 1, 2026 khan Zokhawthar Balukaiah meth kg 3.468 an man a, May 2, Inrinni khan Melbûk khaw huam chhung, Zokhawthar kawngah mi pathum hnen aṭangin meth kg 9.462 an man bawk a, ruihhlo leh a kengtute hi Zokhawthar Police Station-ah an hlan.

Phawngpui khâr

Chhimtuipui Wildlife Division DCF chuan thuchhuah siamin, fûr a thlen dawn tâk avang leh nungchate inthlah pun hun lai a nih chhoh avangin Phawngpui National Park chu May 1 - October 31, 2026 chhung tan mipui tlawh theih loha khar a nih thu a tarlang.

MLA-in hmanpui

Bungtlang West Branch YMA chuan May 2, Inrinni khan an kum 50-na, golden jubilee an lawm a, bialtu MLA T Lalhlimpuia'n a hmanpui. MLA chuan, ruihhlo zuar awm lohna khawtlang an nihna chu chhawm nung zel turin Bungtlang West mipui a chah a; jubilee lawmpuina atan pawisa bakah, keyboard leh volleyball a hlan a ni.

Chawimawina hlân

MJA, Lawngtlai district chuan May 2, Inrinni khan Lawngtlai Press Club-ah Mizoram Civil Services (Combined Competitive) Examination 2025-a Mizoram Information Service (MIS) atana tling Gospel Vanlalpani Vandir, Lawngtlai Vengpui hnenah chawimawina an hlan.