MJA-in Charity Fund an hlân

Mizoram Journalist Association (MJA) Gen. Hqrs chuan nimin khan Charity Fund an thawh khawm aṭangin Aizawl Civil Hospital (ACH) Poor Fund-ah Rs. 40,000 an pe a; MJA pre­si­dent Zonunsanga Khiangte-in ACH medi­cal superintendent Dr Lalhmu­chhuaka hnenah a hlan.

Zonunsanga Khiangte chuan, charity fund chu MJA member-te leh mi ṭha­hnemngaite thawhkhawm a nih thu sawiin, "ACH hi MJA-in Charity Fund a kalpui ṭan tirh aṭanga a ngaih pawimawh berte zinga mi a ni. Mizoram páwna Mizote'n damlohna thila kan pan nasat khawpui palia damlote leh mitthi buaipuina atan Shillong Group YMA, Guwahati, Kolkata leh Mumbai khawpuia Mizo welfare hnenah Rs. 20,000 ṭheuh hlan a ni bawk ang," a ti.

Dr Lalhmuchhuaka chuan, Krismas leh kumthar atana inbuatsaihna an neih nasat thu sawiin, "Hospital-a mawh­phurhna hrang hrang chelh­tute ko khawmin, hospital main­tenance-ah hunpui lo thleng turah harsatna awm lo tura ṭan la turin kan in fuih nasa hle," a ti a; ACH Poor Fund-a sum lutte chu a mamawhtute'n an hman ngei theih tura hma an lak tur thu a sawi.

ACH deputy medical supe­rintendent Dr John Zohming­thanga chuan, ACH leh MJA inkungkaihna a ṭhat thu sawiin, "In thinlungin he damdawi-in hmangaih tak taka kum tina pelh miah loa kan tana in luanchhuahna hi kan lawm hle a ni," a ti. Poor Fund hman danah, damlo pakhata cheng nuai tél sèn ngaite awm cháng awm ṭhin mah se, an tih dan thlakin, damlo harsa zualte chu hospital canteen-ah a báin damdawi ṭum khatah Rs. 2,500 aia tam lo lak theihin an siam ṭhin thu a sawi bawk.

ACH hian kum 2018 khan Poor Fund-ah Rs. 12,50,000 an hmu a, chuta ṭang chuan Rs. 6,66,000 an hmang. November 2019 thleng khan ACH Poor Fund-ah Rs. 4,45,626 an dawng tawh a, chu'ng zinga Rs. 7,00,000 chuang hret chu hman tawh a ni.