Thenzawlah rél a thlen phei theih nan hmalak mek a ni - Chief Minister

Chief minister Lalduhoma chuan May 1, Zirtawpni zan khan a bial chhung Thenzawl Auditorium-ah Serchhip Sub-Headquarters YMA inkhawmpui a hmanpui a; Thenzawlah rél a thlen phei theih nan hma an lak mek thu leh, Aizawl leh Thenzawl inkar kawng chu national highway-a puantir tuma hmalak a nih thu a sawi.

CM Lalduhoma chuan, Serchhip YMA Sub-Headquarters chhungah hmasawnna nasa tak a thleng mek nia sawiin, hmasawnna thleng zel turah inbuatsaih turin YMA member-te a fuih a, "Thenzawl Peace City project kan kalpui a, hemi chhungah hian SASCI Green Field City kan duang bawk a, project pawh kan thehlut tawh. Thenzawlah rél thleng se kan duh thu Central sorkarah kan thlen a, hma an rawn la a, a kawng kalna tur pawh thla hmasa ni 16 khan Railway thuneitute rawn lêngin kan sawiho," a ti.

Thenzawl chu khawpui changkang, mawi leh khualzinte tlawh châk, mipui tam tak chenna hmun a la dawn thu sawiin Lalduhoma chuan, "Eizawnna tam tak a awm dawn. Aizawl leh Thenzawl inkar kawng hi NH nihtir tumin hmalak mek a ni a, tun Thawhṭanni lo awm turah hian Delhi-ah MoRTH minister Nitin Gadkari nen kan sawi dun dawn," a ti a; hmasawnna ruhrel thar din tur a tam dawn avangin Thenzawl PWD chu March 27, 2026 khan division-ah hlan kai a nih thu a sawi.

Lalduhoma chuan, Mat lui chu multipurpose dam tura khuah dan zawn mek a ni a, Brahmaputra Board-in an ûm zui mek thu sawiin, "Mizoram laili leh a chhehvelte khualzin hmunpuia chantir kan tum a, Mizoram ropeway hmasa ber tur siam hna ṭan theih ṭêp a ni. "Heng hi mipui leh kan ram tan a ni a, hmasawnna lo awm zel tur thlir chungin ṭhalaite lo inbuatsaih ila, ṭangkai taka chhawrtu nih ṭheuh kan tum dawn nia," a ti.

Chief Minister chuan, Khankawn-Lungmak Zau phase II (km 5) laih a nih dawn thu te, Baktawng, Hmawngkawn, Chawilung, Thentlang-Lungpho kawng, Buanhmun-Ramrikawn kawngte siam a nih dawn thu te, East Lungdarah phûllem phah a nih dawn thu te, Bungtlang-Matvate kawng te PCC-a siam a nih dawn thu te, Arṭahkawn leh Biate inkar kawng siam a ni dawn thu te, Sialhawkah hall sak a nih dawn thu te, North Vanlaiphai Augmentation of Water Supply Scheme kum hnih thawh zui loh chu tihpuitlin mek a nih thu te sawiin, heng hmasawnna hna thawhna tur hian sum dah hran vek a nih tawh thu a sawi bawk.