MRB-in cheng vbc 152.27 an hlêp

Mizoram Rural Bank chuan May 2, Inrinni khan MRB Head Office-ah MRB Branch Manager Conclave an hmang a, chief minister Lalduhoma'n a hmanpui. MRB hian kum 2025-26 chhung khan deposit cheng vbc 6,526.10 an hmu a, cheng vbc 152.27 an hlêp.

Conclave-ah hian SBI Corporate Centre general manager Prakash Chandra Baror chu khualzahawm a ni a; MRB chairman Sheryl L Vanchhong-in kum 2025-26 chhunga hma an sawnnate a tarlang a, branch ti ṭhate hnenah lawmman sem a ni.

Financial year 2025-26 chhung khan MRB-in deposit cheng vbc 6,526.10 a hmu a, cheng vbc 682.11-in target an khûm a; cheng vbc 152.27 an hlêp. Loan cheng vbc 4,129.98 an pe chhuak a, pek chhuah zat tura bituk (advances target) chu vbc 300 chuangin an khûm a; kum 2025-26 chhunga an credit deposit ratio chu 63.28% niin, Mizorama bank zingah CD ratio sang ber an ni.

Chief Minister chuan, MRB chu Mizote tan an hlu hle tih sawiin, "CD ratio nei ṭha ber pawl bank in ni reng hi a chhuanawm a, bank-te'n CD ratio in neih san hian in sum dawn khawmte mipui tan in pe chhuak tam tihna a ni a, hei hi ram hmasawn nan a pawimawh em em," a ti a; tunlaiah digital banking a ṭhan viau rualin, upate leh thingtlang mipuite tan banking kalphung tiawlsam turin MRB hotute a chah.

MRB manager-te chu sorkar policy a taka chantir tura mipui leh sorkar thlun zawmtu an nih thu sawiin Lalduhoma chuan, "Bána Kaih scheme-ah in pawimawh lehzual. Kan ram hmasawnna turin tih theih in ngah a, kan beisei sang che u," a ti. Thingtlang mipuite'n bank an mamawh avangin an tan theihtawp chhuah turin a chah a; sorkar chu an lamah a ṭan reng dawn thu a sawi bawk.

MRB hi September 27, 1983-ah din a ni a, sorkar laipuiin share 15% a nei a, Mizoram sorkarin 50% leh SBI-in 35% an nei. Regional office pahnih, branch 106 (thingtlangah branch 60) leh thawktu mi 491 an awm mek a ni.