PCI General Assembly neih a ni

Presbyterian Church of India (PCI)-a inkhawmpui lian ber, General Assembly vawi 46-na chu April 28, 2026 khan Phudmuri Presbyterian Church, Shillong-ah hman ṭan niin, PCI General Assembly kum 100-na lawm nghal a ni a, nizan khan a ṭiak.

PCI General Assembly-ah hian Mizoram Synod aṭangin palai 470 chuang an tel a; kum 2028-a General Assembly inkhawmpuia moderator turin Rev. VL Luaia Hranleh, tuna Mizoram Synod-a senior exdcutive secretary chu ruat a ni.

Inkhawmpui hi Phudmuri Kohhranah hman ṭan a ni a, May 2, Inrinni khan Madanheh Stadium, Mawlai Phudmuri-ah General Assembly centenary lawm a ni. Nimin Pathianni khan JN Stadium, Polo Ground-ah inkhawmpui chhunzawm leh a ni a, zanah a ṭiak a ni.

PCI-ah hian synod 11 leh provisional synod pakhat an awm mek a, member 16,84,094 awmin, member tam lamah Mizoram Synod a lian fâl. Inkhawmpui hi kum kar thlakin neih a ni ṭhin a, May thlaa Pathianni hmasa ber hmangin neih a ni tlangpui.