Electric Veng YMA-in Career Fair buatsaih

Electric Veng Branch YMA Literature & Education Sub-Committee chuan May 2, Inrinni khan Electric Veng YMA Hall-ah Career Fair vawi lina an buatsaih a, bialtu MLA K Sapdanga, minister-in a hawng.

Career Fair hi pawl 10 leh 12 zo tharte pualin, an zir zelna tura kawng inkawhhmuhna leh infuihna atana buatsaih a ni a; arts, commerce, science, special education, law, mass media & communication, management, baking, hospitality/tourism, military, territorial army, medical, engineering, handmade business, fashion designing leh cruise chungchangahte kawng inkawhhmuhna turin stall siam a ni.

An veng chhung mi kawng hrang hranga hlawhtlingte rawn theih turin an ṭhu a; Booktale, Beer Seba Group of Institutions, Medhavi Foundation, Women's Polytechnic leh R&D Consultancy te an tel bawk. Electric Veng mite bakah, veng ṭhenawma mi ṭhahnem takin an chhim.

Minister K Sapdanga chuan, zirlaite kawng kawhhmuhna tura Electric Veng YMA-in Career Fair an buatsaih thei chu chhuanawm a tih thu a sawi a, "Tun hnaiah Mizote central service mai bakah, SSC lamah lut kan tlem ta hle mai a, kan ṭan tlan a ngai tak zet a ni," a ti.

K Sapdanga chuan, Career Fair-a tel zirlaite chu tum mumal nei chunga zir chhoh zel tur leh, chumi tur chuan Fair chu hmang ṭangkai turin a chah bawk. Minister hian Fair-a stall hrang hrangte chu a fang kual nghal a ni.

Electric Veng YMA Literature & Education Sub-Committee hian kum 2023 aṭang khan kum tin Career Fair an buatsaih ṭhin a ni.