Ruihhlo do kawngah hma kan sawn - END Minister
Excise & Narcotics minister Dr K Beichhua chuan, zu leh ruihhlo do kawngah hma an sawn zela an inhriat thu sawiin, "Mizoram Liquor Prohibition (MLP) Rules pawh Krismas hmain kan tichhuak ang," a ti.
Vanglaini palai zawhna chhangin END Minister chuan, ruihhlo do kawngah theihtawp an chhuah tih a sawi a, "Hunpui a hnaih avanga ṭan thar thut leh chuan ngaihna vak a awm lo. Kumtluanin tha thlah loin hma kan la a, Rangvamual leh a chhehvela zu siamna hmunte pawh luhchhuahin kan tichhe nasa hle," a ti a, theihtawp chhuaha ruihhlo do hna an thawh zel dawn thu a sawi.
Dr K Beichhua chuan, an department-ah thawktu tlem mahse a awm ang angin theihtawp chhuahin ruihhlo an do thu a sawi a, "Kum tharah thawktu kan inlak belh dawn a, chu'ngte nen chuan nasa lehzualin ruihhlo kan do thei ang," a ti.
Zu donaah chak leh zuala hmalakna atan MLP Rules thar chu circular-a tihchhuah thuai an tum thu sawiin END Minister chuan, "Krismas hma ngeia tihchhuah hman kan tum," a ti a, ruihhlo dona tichak turin state level leh district level-ah board din a nih tur thu a sawi. MLP Rules 2009 hi December 19 khan tihchhuah a ni.