No Vehicle Zone kalpui dan tur

Coordination Commi­ttee on Traffic Management ruahman angin Decem­ber 23, 24 leh 31-ahte Aizawl khawpuia Zodin Square leh Chanmari kâwn inkarah chawhma dar 10 aṭanga tlai dar 4 thlengin No Vehicle Zone kalpui a ni dawn a; No Vehicle Zone hun leh huam chhungah lirthei tlan phal a ni dawn lo.

x    No Vehicle Zone huam chhungah lirthei reng reng (thirsakawr leh nawrlirh telin) tlân phal a ni lo. Hei hian damdawi-ina emergency duty bakah, natna avanga damdawi-in pante a huam lo.

x    Aizawl Civil Hospital aṭanga lirthei chhuak, chhim lam pan turte chu Dawrpui biak-in lama kual loin Bazar Bungkawn an pan nghal thei ang.

x    Dawrpui taxi stand chu Baza Tlang hnuai, AR mandir epah leh AR Quarter Guard hnuaiah sawn a ni.

x    Chhinga Venga Tuithiang-Bethlehem pêng aṭangin Saron Veng lamah chho zawnga tlân phal a ni lo.

x    Hmâr lam aṭanga city bus tlante chu Chanmari kâwnah Chanmari Presbyterian biak-in hêlin hmar lamah lêt tur a ni. Lirthei tê, maxicab chin hnuai lamte chu MacDonald Hill-ah tlân chhoh theih a ni a, Mizo High School Field chu parking atan ruahman a ni.

x    Chhim lam aṭanga hmar lam pan city bus-te chu Zodin Square-ah AR mandir hêlin chhim lamah tlan lêt leh tur a ni.

x    No Vehicle Zone huam chhungah te, Hrangbana College - Mizo H/S Field inkarah te, Temple-Vaivakawn inkarah te, Vaivakawn-Hunthar- Chanmari inkarah te, Bawngkawn-Sikulpuikawn via Ramhlun-Electric Veng-Chhinga Veng-Bethlehem-Republic Veng-Upper Republic inkarah te, Sihpui-Chhinga Veng via Electric Veng inkarah kawngpui sirah lirthei dah/hûn phal a ni lo.