KHAWTHLIR

Painting Exhibition

Information & Public Relations director K Vanlalsangi chuan nimin khan Aizawl Art Gallery-ah Ṭanpuia kutchhuak lemziak pho chhuahna, Solo Painting Exibition vawi 13-na a hawng. Exhibition hi May 9, 2026 thleng chawhma dar 10 aṭanga tlai dar 5:30 inkarah mipui tlawh theiha hawn a ni ang. Ṭanpuia hian kum 1999 aṭangin solo exhibition a buatsaih ṭan a, Aizawl bakah Bangalore leh Kolkata-ah pawh a buatsaih tawh a ni.

Kawng khâr dawn

Sakawrtuichhun aṭanga Aizawl Zoological Park lama NH-54 pawh thlakna kawng chu PWD-in an siam dawn a, hei vang hian helai kawng hi vawiin aṭanga hna thawh zawh hma chu khâr tur a nih thu Traffic SP C Vanlalvena chuan a tarlang.

Futsal ground

Lok Sabha MP Richard Vanlalhmangaiha chuan nimin khan Thingdawl VC II-ah a MP Fund (2024-25) Rs 15,00,000 hmanga siam futsal ground thar a hawng. MP chuan, ruihhlo donaah ṭanrual a ṭul thu sawiin, "Kan ṭhalaite ruihhlo vangin an thi nasa a, chutihrualin, ruihhlo lakah kan ṭhalaite an chhe vek bik lo. Ruihhloin a tihbuai ve loh ṭhalai fel tak tak an tam a, hengte hi min fuih thartu atan kan hman a ngai," a ti. Futsal ground hawn pual hian tournament buatsaih nghal a ni.

AR-in zahna hlan

Assam Rifles Lunglei battalion chuan May 3, Pathianni khan an hmunah 23 Assam Rifles aṭanga ram leh hnam tana nunna hlantute hriatrengna hun an hmang a, hriatrengna lungphunah zahna pangpar an dah. Zahna an hlante chu May 3, 2015-a Changsa khua, agaland Mon district-a helpawl nena inbeihnaa thite an ni a; an zingah Zo hnahthlak pathum an tel.

Faina sawiho

Lawngtlai District Solid Waste Management Committee chu an chairman Donny Lalruatsanga, bawrhsap hoin nimin khan an ṭhukhawm a; faina kawnga chak zawka hmalak a nih theih nan district, block leh village level-ah Solid Waste Enforcement Commitee leh District/Block Level Grievance Redressal Commitee din an rel.