Sorkar laipuia Textiles Minister-in Sericulture Training Institute a tlawh

Union Textiles minister Giriraj Singh chuan nimin zing khan Zemabawka Sericulture Training Institute (STI) a tlawh a; Mizorama muga silk pangang khawitute chu hmahruaitu, Muga leader-ah siam a tum thu leh, Mizoram tan Silk Samagra 2.0 hnuaiah cheng vbc 4,679.86 pek a nih thu a sawi.

Giriraj Singh chuan, Mizorama khaw 211-a kut hnathawktute nena inzawmna thûk zawk siam tura Mizorama zin a nih thu a sawi a, "Mizoram hi hmarchhak state zingah silk chi li - muga, eri, mulberry leh tasar nei thei awm chhun a ni a, in vannei tak zet. District 11-a kut hnathawktu 6,000 leh mimal 19,000 zet chuan silk hi innghahna ber leh eizawnna ber atan an hmang a, Mizorama muga silk pangngang khawitute hi hmahruaitu - muga leader-ah siam ka tum," a ti.

Mizoram sik leh sa (climate) leh lei (soil) chu sericulture tan a ṭha hle tih sawiin Giriraj Singh chuan, "Mizoram tan Silk Samagra 2.0 hnuaiah cheng vbc 4,679.86 sanction a ni. Mizoram hi cluster-ah inṭhen se, Lunglei, Champhai, Saitual leh Siaha district chu muga district atan leh district dang zawng chu silk variety dang khàwi nan hman ni se," a ti a; cluster siama hmalak a nih chuan kut hnathawktuteah hmasawnna chak zawka a thlen thu leh, cluster behchhana hmalak a nih chuan Central Silk Board aṭangin ṭanpuina dawn theih a nih thu a sawi.

Textile Minister chuan, silk pangang khawitute'n hma an sawn theih nan an inkarah inelna thianghlim buatsaih tur te, kut hnathawktute tan tehfung hrang hrang siam tur leh, a ti ṭha zualte tan lawmman siam turin sorkar thuneitute a chah. Silk hmanga puantah leh puanṭhuia eizawngtute chu National Institute of Fashion Technology-te nena thawhho dan zawnsak a tum thu a sawi bawk.

Sericulture minister Lalthansanga pawhin thu sawiin, sorkar laipui scheme hrang hrang kaltlanga hmasawnna an hmuh ṭhin thu a sawi a, "Sericulture kaihhnawih hmasawnna ruhrel din tur tam tak a la awm avangin Central sorkar puihna kan mamawh hle a, Silk Samagra 2.0 hnuaiah Mizoramin processing unit a din a, Mizorama pangang khawitute coccoon thar pawh state dangah hralh a ni," a ti a; Bana Kaih hnuaiah Sericulture department ngaih pawimawh a nih thu a sawi.

Giriraj Singh hi Ministry of Textiles commissioner Vrunda Manohar Desai, Central Silk Board (CSB) member secretary P Siva Kumar leh hotu dangte'n an ṭawiawm a; Sericulture Training Institute tlawhnaah hian Mizoram Sericulture secretary Florence Zotluangpuii, director Lalrinawma leh mi pawimawh dangte an tel.

Textile Minister leh a thawhpuite hian Zemabawk STI-ah hian muga silk pangang khawina thing (som tree) an phun a; STI campus-a silk siam chhuahna hmun Silk Reeling Factory an tlawh bawk.