MPSC-in group B (non-gazetted) Hnuai lam hna lak tur 16 an la nei

Mizoram Public Service Commission (MPSC) chuan sorkar hna­thawk group B (non-gazetted) chin hnuai lam hna lakna turah exam la buatsaih loh department pariat aṭangin direct recruitment post 14 leh departmental promotion pahnih buaipui tur an la nei.

MPSC-in group B (non-gazetted) hnuai lam a lak turte chu - ARCS Champhaiah UDC (contract) pakhat, Art & Culture department-ah museum guide pakhat leh chemist-II (Archives) pakhat, School Education department-ah middle school contract teacher pakhat (Gorkha), Agri­culture (CH) depart­ment-ah junior engi­neer pathum, PHE depart­ment-ah junior engineer/draftsman, Home department-ah assistant jailer leh sub-inspector pakhat ve ve, Fisheries department-ah UDC pahnih leh Taxation department-ah UDC panga te a ni. 

Tarlan tawh ṭhin angin, June 10, 2019-a Council of Ministers ṭhu­khawm chuan, MPSC-in Mizoram sorkara thawk tur lakna a khawih ṭhin zinga group B (non-gazetted) leh a hnuai lam chu MPSC aṭanga la chhuakin, a buaipuitu tur Mizoram Subordinate Services Selection Board (MSSSB) din an rêl a; MSSSB chu din tura hmalak mek a ni. 

Sorkar department-in hna lak tura an thawnah, MPSC-in advertisement an la chhuah hman loh zingah group B (non-gazetted) tur eng emaw zat a awm a; chu'ngte chu a petu department-ah an thawn lêt leh vek tawh. Cabinet thutlukna awm hmaa group B (non-gazetted) chin hnuai lam advertisement an chhuah hman tawhte chu May 2020-ah school calender milin exam hun tur tihfel vek an tum thu MPSC hotute chuan an sawi.