Myanmar sipaite'n Khawpuichhip an bei, mi 7 an thi, Mizoramah raltlan an luh belh

May 1, 2026 chawhnu lam khan Myanmar sipaite'n Myanmar Falam Township chhunga Khawpuichhip khua an bei a, mi pasarih thiin, mi eng emaw zat an hliam. He inbeihna avang hian Zokhawtharah raltlan eng emaw zat an luh belh.

Thu dawn danin, Myanmar sipaite hian indo thlawhna leh bomb hmangin Khawpuichhip khua an bei a, bomb eng emaw zat an thlak. Bomb thlak avang hian mi pasarih an thi a, mi eng emaw zat an hliam a ni. Nikum lamah pawh Myanmar sipaite'n Khawpuichhip hi an lo bei tawh ṭhin a, May 1-a an beih hi Mizoram ramri hnaia Myanmar sipaite indo thlawhna hmanga an chet ṭum thumna a ni.

Khawpuichhip beihna avang hian Zokhawtharah raltlan eng emaw zat an luh belh a; Ṭiau lui lei paltlangin lut mi 30 vel leh lui kâna lut mi 100 vel an awma sawi a ni.

Myanmar sipaite'n thlawhna leh bomb hmangin Khawpuichhip an bei chu an dem tak zet thu Zo Re-unification Organisation (ZORO) chuan an tarlang a, "Myanmar democracy sorkar, mipui thlan a ding ta, tia chhuang taka a puan chhuah chu a hming mai a nihzia leh sipai thuneihna hnuaia la awmin, nunrâwng takin a mipuite a la bei chhunzawm ta zel a ni tih lantirtu chiang tak a ni," an ti.

ZORO chuan, Myanmar sorkar leh sipaite chêt dan chu UN Declaration on the Rights of Indigenous Peoples, 2007 bawhchhiatna a nih thu sawiin, UNO-ah thlen ngei an tum thu an tarlang.