'Faina Puitu' app tlangzarh a ni

Bawlhhlawh paih chungchanga mipui pui thei tura duan 'Faina Puitu' mobile application chu nimin khan PHE minister Prof. Lalnilawma'n PHE Engineer-in-Chief meeting hall-ah a tlangzarh.

PHE Minister chuan, Mizoram sorkarin khawvel hmasawnna a ûm ve zel thu a sawi a, "Kan bawlhhlawh ṭangkai taka hman theih dan tam tak a awm a, thil ṭangkai tak taka hman theihte a awm. Tunlaiah chuan a hmangchang hria apiang hi ram changkang leh hmasawn kan tihte an ni. Faina lam inzirtir a ṭul a, a lang lo lamah kan la fai lo a tih theih," a ti.

Faina Puitu chu PHE-in bawlhhlawh paih an enkawl thingtlangah chauh hman theih a la nih thu sawiin Lalnilawma chuan, "Aizawl khawpui hlei hleiin a mamawh. Bawlhhlawh paih motor kal hun hriat chuan thil a awlsam dawn," a ti a; Aizawl leh khawpui dangah la hman theih a nih ngei a beisei thu a sawi.

Faina Puitu app hi Playstore aṭangin lak (download) theih a ni a, kum khat chhung atan a thlawna lak theih niin, kum khat hnuah chuan registration fee Rs 10 pek a ngai dawn. Aizawl Municipal Corporation, Lunglei Municipal Council leh khawpui dangte pawhin an duh a nih chuan an hmang ve thei dawn a ni.

FAINA PUITU NIHPHUNG

▶ Bawlhhlawh paih lirthei thlen chin leh point hrang hranga bawlhhlawh an khawn tawh chin a hriat theih.

▶ Bawlhhlawh ṭawih thei leh ṭawih thei loh paih hun hriat theih a ni.

▶ Complaint thehluh theih a ni a, a kaihhnawih thuneitu hnen a thleng ang.

▶ Thil dang atana bawlhhlawh sâwngbawl theih (re-cycle waste) hralh theihna tur a awm.

▶ Lirthei chhiat vang emaw, thil dang emaw vanga bawlhhlawh paih lirthei a kal dawn lohin hriattirna a awm ṭhin dawn.

▶ Bawlhhlawh chungchanga dan chi hrang hrang awmte dah tel a ni.