Tourism Minister leh Secretary an inkâwm; Tourism-a Mizoram hmasawnna an sawi dun

Tourism minister Lalnghing-lova Hmar chuan nimin khan sorkar laipuia Tourism secretary Buhuvnesh Kumar chu Delhi-ah a kâwm a, tourism lama Mizoram hmasawnna tur a sawipui.

Lalnghinglova Hmar chuan, tun hnaiah Mizoramah khualzin an pun thu te, chumi dawngsawng tura inbuatsaihna leh inzirtirna (capacity building & awareness campaign) ṭha zawk neih a ṭul thute a sawi a; Mizo khawtlang nun pawlh dal loa khualzin dawnsawn a nih theih nan Mizoram sorkar ruahmanna leh hmathlirte sawiin, sorkar laipui nen thawhho theih dan tura rawtna a neihte a hrilhfiah a ni.

Mizoram chu khualzin tlawh châkawma siam mai bakah, khualzinte châm rei theihna hmun ni se an duh tih sawiin Tourism Minister chuan, "Khualzinte an lo thlen hlima Aizawl leh a chhehvela hun rei zawk an hman theih dan leh, chuta ṭanga Mizoram hmun danga an zin chhuah dan ruahmanna kan siam mek," a ti a; Aizawl chhehvela khualzin hîpna hmun chei dan turte a sawi.

Union Tourism Secretary chuan, tun hnai maiah Aizawl leh Thenzawl a tlawh thu leh khualzin hîp tura theihna a neih sàn thu a sawi a, "Aizawl aṭanga ban phak maiah khualzin hîpna thil lian tham din a ṭul. Sorkar laipui hmachhawp 'One state: One global destination' project hi khualzin luh tamna ber, riahna leh ei leh in lamna remchang tamna ber Aizawl aṭanga ban phaka duan a ṭha," a ti.

Lalnghinglova Hmar-in, 'Winter Capital of India' nih tuma hmalakna a awm mek thu leh, a ṭul anga sorkar laipui puihna an mamawh dante a sawi chungchangah Bhuvnesh Kumar chuan, hun bik tinzâwn neia khualzin hîp tum chu thil ṭha leh finthlak a nih thu a sawi a, a office aṭanga a thlâwp tlat tur thu a hrilh a ni.