AIR kum 90-na pualin Musical Concert

All India Radio (AIR), Aizawl chuan nimin khan AIR kum 90 tlin lawmna atan Central YMA Hall-ah Musical Concert an buatsaih a; Information & Public Relations, Printing & Stationery (IPRPS) minister B Lalchhanzova’n a hmanpui.

Musical Concert-ah hian Minister hian AIR top grade artist Vanhlupuii leh 'A' grade artist pali - Laltlanthangi Pachuau, Siampuii Sailo, C Vansanga leh Rualthankhuma Chhakchhuak te hnenah chawimawina a hlan. Zaithiam eng emaw zat an zai bakah, Gorkha Cultural Club leh Hrangbana College ten hnam làm an entir a ni.

B Lalchhanzova chuan, AIR chu thu leh hla hmanga mi tin phuar khawmtu a nih thu a sawi a, "AIR, Aizawl hi Mizo hnam zia leh ṭawng vawnhim kawnga thawh hlâwk tak a ni a, ṭawngkam dik leh ṭawng dan mawi, Mizo ṭawng dik vawnhim a nih dante hi zir chian ni se, AIR thawh hlawkna hi sawi sên a nih lo ang. Thu leh hlaa AIR-in kan hnam lungphum a phum hi ziakmi, sawimi leh zaimite hian an pho lan zel ka beisei," a ti.

Mi dangte kawng dik zawhtir tura hringnun hmangtute an ropui thu sawiin IPR Minister chuan, "Information technology a chak tawh si a, tunlaia kan ṭhalaite hian nun dan tur ber pawh hre tawh mang loin, a dik ber pawh thliar thiam tawh mang loin hringnun an hmang a, Mizo hnam kal zelna turah mi dangte kaihruaia nun kawng dik zawhtirtu kan mamawh," a ti a; ṭhalaite'n nun dan dik leh kawng dik an zawh zel theih nan AIR-in mawhphurhna sang tak a neih thu a sawi.

AIR, Aizawl director DR Lalropuia pawhin thu sawiin, AIR chu June 8, 1936-ah din a nih thu a sawi a, "Thu leh hla puan chhuahna ringawt ni loin, ram hmasawnna tura thawktu sorkar leh mipui thlun zawmtu ṭangkai tak a ni a, tun thlengin mipui rin ber a la ni," a ti a; tunlai thiamna tharte hmasawnpui tura zir belh zel turin thawktute a chah.

AIR hi June 8, 1936 khan din a ni a, New Delhi-ah headquarters awmin, Aizawl Station hi India rama station 230 zinga pakhat a ni. AIR kum 90 tlin pual hian AIR, Aizawl hian May 8, 2026-ah walkathon an buatsaih dawn a, a lawmnapui ber chu June 8, 2026-ah Vanapa Hall-ah hman a ni ang.