Mipa hockey zirna tur mamawh a nih thu Sports Minister-in sorkar laipuiah a thlen

Sports & Youth Services minister Lalnghinglova Hmar chuan May 5, Thawhlehni tlaiah khan Ministry of Youth Affairs & Sports secretary Hari Ranjan Rao, SAI director general ni bawk chu SAI Headquarters, New Delhi-ah a kâwm a; Mizorama hockey hmasawnna tur sawipuiin, Mizoramin mipa hockey zirna a mamawh thu a thlen.

Lalnghinglova Hmar chuan, hockey chu Mizote thiam chi a nih thu sawiin, "Hockey hi India tana international medal lak theihna kawng hnai a ni. Thenzawla hmeichhe hockey zirna kan neih hi kan ṭhatpui em em a, hetiang model hian mipa tana hockey zirna siam kan duh," a ti a; Empowering Mizoram Sports hnuaia discipline pali - hockey, badminton, archery leh wrestling-ah te SAI Training Centre din belh theih dan ngaihtuah ni se a duh thu a sawi.

Hari Ranjan Rao chuan, hockey tihhmasawnna atan theihtawp chhuah a nih tur thu sawiin, "Hmunhma awm sa hmang ṭangkaia a zirna changtlung zawk siam theih dan kan lo zir chian ang. India sorkarin hockey a ngai pawimawh. Mizoramin infiamna hmasawnna tur hmathlir (vision) fel tak in nei a, hemi bawhzuia in kal chuan Mizoram hian infiamnaa India hmasawn zelnaah dinhmun pawimawh in luah thei ang," a ti.

Tun hnaia badminton-a Mizoram hmasawnna a hriat thu leh a lawm thu sawiin MoYAS secretary chuan, football-a Mizote hlawhtlinna ang chu infiamna dangah pawh tih theih a nih a rin thu a sawi a; Khelo India accredited training center ni tura Mizorama infiamna zirna kalpuina hrang hrang chu her rem ṭha a tih thu a sawi bawk.

Sports Minister hi New Delhi Mizoram House resident commissioner Shweta Chauhan-i'n a ṭawiawm a ni.