Power Minister-in AR chhuahsan rama power sub-station dahna tur enfiah

Power & Electricity minister F Rodingliana leh Lammual Advisory Committee te chuan nimin zing khan Assam Rifles chhuahsan rama 33KV gas insulated power sub-station dahna tur hmun te, hmun pawimawh hrang hrang sak tura power mamawh dan turte leh hrui kaltir dan turte an enfiah.

AR chhuahsan ramah hian cheng vbc 22.36 sêngin 33KV power sub-station dah tum a ni a, Mizoram sorkarin sum a pe chhuak tawh. Hei bakah hian, AR chhuahsan chhunga dah tur hmun pawimawh tak tak - Vanapa Hall, amphitheater, PHED tuizem lian (litre nuai 12 dawng) bakah, Aizawl Square te kawlphetha mamawh pek chhâwnna tur a awm dawn a, chung atan chuan cheng vbc 9.2 ruahman a ni.

33kV sub-station hian Aizawl khawpui châwmtu 33kV Indoor Sub-Station, 33kV Maumual Sub-Station, 33kV Chawnpui Sub-Station leh 33kV Tlangnuam Sub-Station te a chhâwk zângkhai thei dawn a, Aizawla kawlphetha sem chhuahnaa mamawhte nasa takin a phuhrûk thei dawn a ni.

Lammuala power sub-station hmanga AR chhuahsan ram chhunga kawlphetha pek chhuahna hi leia phûm tum a ni a; gas insulated sub-station hi sub-station pangngai aiin hmun a mamawh tlem a, metre 34X26 bial vel chauh a awh dawn niin sorkar thuchhuahin a tarlang.