Ráltlânte ṭanpuina pek dan tur sawiho

Champhai bawrhsap Mohammad Aaquib, sorkar official-te leh tlawmngai pawlte chuan nimin khan DC conference hall-ah Champhai district-a ráltlânte hnena ṭanpuina pek dan tur an ngaihtuah.

Bawrhsap kaihhruai ṭhutkhawmah hian Myanmar aṭanga Mizorama rawn raltlante leh a thlengtu khawtlang mipui harsa zawkte tana himna leh eizawnna siamsak tura hmalakna, PATHRISE Project 2026 chungchang an thlirho. PATHRISE Project hi raltlante leh anmahni thlengtu khawtlang mipui mamawh hrang hrang phuhrûkna atana ruahmanna a ni.

PATHRISE Project hnuaia thawkte chuan raltlante'n an belh khawtlang mipui chhawm-dawlna tura hma an lak tawh dan leh an hmachhawp te an sawi a; Myanmar aṭanga raltlante hriat tur pawimawh - dan leh hrai zirtir te, Umbrella Protection hnuaia hma an lak tawh tawhnate an tarlang.

Ṭhutkhawmah hian Health department aiawhte'n raltlante tana damdawia chhawm-dawlna an kalpui tawh dan te, damlo an enkawl dante an sawi a; Zoram Entu Pawl leh tlawmngai pawl dangte'n hma an lak tawh dan an sawi bawk.

Raltlante chhinchhiahna (biometric enrolment) chu hmun tam zawkah zawh tawh a ni a, la tih lohna tlem azawng la awmah a rang thei ang bera tih tum a nih thu sawi a ni.