CSR workshop-ah Adviser to CM tel

World Resources Institute (WRI) chuan nimin khan Novotel Conference Hall, Guwahati-ah 'CSR Workshop on Clean Energy for Development in Northeast India' an buatsaih a; adviser to chief minister (Finance) TBC Lalvenchhunga, Mizoram CSR Cell chairman ni bawk chu khualzahawm a ni.

Workshop-ah hian hmarchhak state hrang hrang aṭangin sorkara CSR (corporate social responsibility) buaipuitu te, CSR fund dawng ṭhin pawl aiawhte leh CSR pe ṭhin company hotute an tel a; renewable energy lama CSR sum hman ṭangkai theih dan te, harsatna awm ṭhinte leh hmasawn dan turte zirho a ni. TBC Lalvenchhunga hi Mizoram CSR Cell hotute'n an ṭawiawm.

Mizoram CSR Cell Chairmnan chuan, India rama CSR sum hman zat aṭanga chhûtin hmarchhak bialin CSR an dawn tlem thu a sawi a, "Hmarchhak state zingah Mizoramin CSR fund kan dawng tlem ber a, hei hi siamṭhat a ngai. CSR hi vawi khat thilpek (one-time donation) ang maia ngaih a ni fo a, ram hmasawnna tura hun rei tak awh tur project leh programme rintlak kalpui theih a nihna hi kan hriat a ṭha," a ti.

Renewable energy chungchanga Mizoram sorkar hmalaknate sawiin TBC Lalvenchhunga chuan, "PM Surya Ghar: Muft Bijli Yojana' (roof-top solar) chak zawka kalpui a nih theih nan Mizoram sorkarin central subsidy awm sa bakah state subsidy a pek belh a, hma kan sawnpui hle. Solar policy thar pawh duan a ni," a ti a; hmasawnna tluantling nei turin renewable energy policy mumal tak neih a ṭul thu leh project hrang hrangte vawn ṭhat leh endik kawngah ṭan lak a ṭul thu a sawi.