WCD-PMKSY 2.0 Conference hmang

Rural Development & Administration (RDA) minister Prof. Lalnilawma chuan May 6, Nilaini khan Aijal Club-ah Watershed Development Component - Pradhan Mantri Krishi Sinchayee Yojana (WCD-PMKSY) 2.0 Conference a hmanpui a, PMKSY kalpui ṭhate hnenah PMKSY Award a hlan.

Prof. Lalnilawma chuan, PMKSY 2.0 chu September 2026 thleng pawhsei nih thu sawiin, ṭha taka a tâwp an khâr theih nan ṭan la zel tur leh, PMKSY 3.0 awm leh tur pawh mipui leh ram tana ro tling thlentu a nih theih nan uluk lehzuala rilru sêng turin thawktute a chah.

RDA Minister chuan, PMKSY chu tuihna tihpun nan leh chhiatrupna thleng thei laka him nan a pawimawh thu a sawi "Sorkar hmalaknate'n rah ṭha zawk a chhuah theih nan department dangte nena thawhho a pawimawh a, department chhungah scheme hrang hrang kan thawk a nih pawhin sâwt zawka hna thawk thei turin department dangte nena thawhhona (convergence) felfai tak neih a ṭul," a ti.

WCD-PMKSY 2.0 Conference hi RDA secretary V Lalengmawia’n a kaihruai a; RDA director K Lalrohlua'n department hnathawh dan leh hmalakna hrang hrangte a tarlang. WDC-PMKSY hmalaknate thlirho a ni a, district leh project hrang hrangte'n WDC-PMKSY hnuaia an thar chhuah leh hmalakna pho chhuahna (exhibition) buatsaih a ni bawk.

WDC-PMKSY-in a tuam chin project-ah ram leh leilung luang ral tur ven leh humhalh hna thawh a ni ber a; chumi atan chuan Natural Resource Management kalpui niin, hmalakna hrang hrang - land development, soil & moisture conservation leh water harvesting structure-te kalpui a ni.

Land development hnuaiah hian afforestation leh horticulture development-ah a hmalak a ni a; soil & moisture conservation hnuaiah terrace, contour, dunding, check-dam leh wet-rice cultivation siam leh remchang dangte thawh a ni. Water harvesting structure hnuaiah hian tui lakna leh dah khawlna te, percolation tank leh farm pond te siam ṭhin a ni thung.

Project tuam chin khuaa mite zingah khawsak harsa leh hmeithai, eizawnna mumal nei lote eizawnna tur ruahmanna, Livelihood for Assetless leh Production System & Micro-enterprise a awm bawk.

PMKSY AWARD DAWNGTUTE

Best Project Implemmenting Agency
* Khawzawl-1 DRDO Project Director
* Siaha-1 DRDO Project Director

Best Subject Matter Specialist
* H Lalnunsanga, Khawzawl district
* Sangnunmawia, Lunglei district

Best Accountant
* Roluahpuii, Hnahthial district
* Lalhmachhuana Sailo, Mamit district

Best Data Entry Operator
* Lalṭhazeli Renthlei, Kolasib district
* Lalhnuna, Mamit district

Best Watershed Development Team
* TBC Roluahpuia, Kolasib-II Project
* C Lalhmingliani, Mamit-1 Project
* Lalmuanpuia, Mamit-1 Project

Jan-Bhagidari Cup
1-na Lunglei-I
2-na Hnahthial-I
3-na Lunglei-II
4-na Kolasib-I
5-na Serchhip-I
Lawngtlai-III