HIV+ve hmuh thar mi 80 zingah anpui kawp mi 2

Champhai district-ah kum 2025-26 financial year chhung khan HIV vei mi 80 hmuh chhuah thar an ni a; chu'ng zingah chuan mahni anpui kawp (mipat-mipatna) aṭanga kai mi pahnih an tel.

Tun hnai khan Champhai District AIDS Prevention Control Committee an ṭhu a; ṭhutkhawma tarlan danin, kum 2025-26 chhung khan Champhai district-a thisen endik 6,558 zingah HIV vei mi 80 hmuh chhuah an ni. HIV+ve hmuh thar mi 80 zinga 62 (77.50%) chu mipat hmeichhiatna aṭanga kai an ni a, mahni anpui kawp aṭanga kai mi pahnih bakah, hriau thianghlim lo hman aṭanga kai mi 11, nu-in a nau paia a kai chhawn pakhat leh, kai chhan hriat loh mi pali an awm bawk.

Champhai District AIDS Prevention Control Committee hi district bawrhsap Mohammad Aaquib hoin an ṭhukhawm a; Mobilization for AIDS Suraksha hman dan tur an rêl bakah, HIV/AIDS darh zel tur ven kawnga hmalakna leh hmachhawpte an thlirho.