Cheng nuai 200 hù meizial tichhia

Champhaia Legal Metrology office tualah nimin khan Controller of Legal Metrology thupek leh District Magistrate hriatpuinain July 2025 - January 2026 chhunga Champhai district-a ram dang aṭanga dan loa lak luh meizial cheng nuai 200 hû tihchhiat a ni.

July 2025 thla aṭanga kumin January thleng khan Champhai district-ah ram dang aṭanga dan loa lak luh meizial báwm (packet) 3,09,712 man a ni a, tualchhunga hralhna ang chuan cheng nuai 200 hùa chhût a ni. Dan loa meizial lak luhte hian Legal Metrology Act, 2009 an zawm loh avangin Legal Metrology (Enforcement) Rule, 2010 Rule 19 (4) & (6) hmangin Controller of Legal Metrology chuan tihchhiat phalna thupek (disposal order) a chhuah a ni.

Tarlan danin, dan loa lak luh meizial (cigarette)-te hian chhiah an chawi lo a, declaration mumal an neih loh bakah, dan hnuaia zawrh ṭhin cigarette hralhna a nghawng tel bawk avangin Legal Metrology (Packaged Commodities) Rules 2011 rule 6 leh The Legal Metrology Act, 2009 section 18 in thuneihna a pek angin thuneitute'n an man ṭhin tih sorkar thuchhuahin a tarlang.