Zirnaah dâwih taka ke pên kan tum lo - Education Minister

Mizoram Education Inspecting Officers' Association chuan nimin khan Aijal Club-ah General Conference an hmang a; hun hmanpuitu Education minister Dr Vanlalthlana chuan, Mizoram zirna chungchangah dâwih taka ke pên an tum loh thu a sawi.

Education Minister chuan, zirnaa an thawh­honaah danglamna an siam chhoh zel thu sawiin, "Zirnaah hian dâwih taka ke pên kan tum lo. Tun hnaia danglamna kan siamte hi thawhhona rah a ni a, officer leh zirtirtute thawhrimna rah a ni," a ti.

Dr Vanlalthlana chuan, tun hnaia HSLC leh HSSLC result tihchhuah dan chu thil thar a ni lo tih sawiin, "Board lianah leh state dangah pawh an hman lai reng a ni. Zirlaite hian an exam-ah hian mark hnih khat lekin division sang an pha lo thei a, mark hnih khat leka dinhmun inthlau taka dah hi naupang zirna lama chak lo zawk tan a ṭha lo. A ti ṭha tan chuan mark sang an hmuh hian an lawm tho a, a ti chhe deuh tihnual thei division hi ṭul kan ti lo a ni," a ti a; zirna lama mi entawn Finland-ah chuan kum 20 chuang ranking an siam tawh loh thu a sawi.

Education Minister chuan, School Education department-a inspecting officer-te chu zirna atana an thawhhonaah lawmthu hrilhin, Performance Grading Index-ah hma­sawnna a awm theih nan ngaihtuahna hmang turin a chah a; Mizoram zirnain hma a sawn zel theih nan theihtawp chhuaha thawhhopuiah a sáwm.

MEIOA inkhawmpuiah hian an pawl hmalakna turte an rel a, hruaitu thar an thlang nghal. An pawlah hian member 48 an awm mek a ni.