Larsapin RTFFM leh TRI sak mek a enfiah

Governor Gen. Vijay Kumar Singh chuan May 7, Ningani khan Ministry of Tribal Affairs hnuaia Tribal Reserch Institute (TRI) leh Ropuiliani Tribal Freedom Fighters Museum (RTFFM), Kelsiha sak hnathawh mek a tlawh a, hna thawh dan a enfiah.

Larsap chuan, hnam ziaráng, nunphung leh tih dante ngaihhluta vawnhim a pawimawh thu sawiin, "TRI leh RTFFM te hi ṭangkai taka hman tura siam a ṭul. Khualzin, zirlai leh zirbingmite tana tlawh manhla ni tura duang turin line department-te'n hma in lak a ṭul," a ti a; tribal hnam ziaráng leh Mizo chanchinte awmze nei taka pho lan a nih theih nan hun bituk siama hawn hma ngeia a nih dan tur dik tak a nih thei nana theihtawp chhuah turin a chah.

Gen. VK Singh hian a ngaimawh leh ṭul nia hriatte line department-te leh Planning hotute hnenah a hrilh a; hun remchang hmasa berah hmalak dante enfiah leh a tum thu a sawi.

Larsap hi Planning secretary David Lalthantluanga leh additional secretary Dr Lalrinchhana, PWD chief engineer Robin Lalrinawma, Horticulture additional director Lucy Zaithangpuii leh Art & Culture joint secretary TC Lalkhuma ten an ṭawiawm a, hma an lak dante an hrilhfiah a ni.