KHAWTHLIR

Thisen pe

Mamawii Higher Secondary School NSS chuan nimin khan an sikulah thisen pek huaihawtin, Civil Hospital, Aizawl tan thisen unit 45 an pe a, petute mipa 37 leh hmeichhia pariat an ni. KṬP, Sairang Dinthar Bial pawhin May 7, Ningani khan thisen pek an huaihawt a, mipa 35 leh hmeichhia pakua ten Civil Hospital Aizawl tan thisen unit 44 an pe.

ZPM Zonu President thar

ZPM president mawhphurhna la mektu Lalduhoma chuan ZPM hmeichhe pawl, Zonu president atan Dr C Malsawmtuangi, Hlimen a ruat. Zonu president ni lai R Lalawmpuii chu Aizawl deputy mayor a nih tâk avangin Zonu president a nih zui a rem lo a, chuvang chuan president thar ruat a nih thu a tarlang.

CM-in tlawh

Chief minister Lalduhoma chuan nimin khan Lunglei Civil Hospital-a Health ATM leh Leitlangpui High School-a Astronomy Laboratory a tlawh. Health ATM leh Astronomy Lab te hi Lunglei bawrhsap Navneet Mann hmalaknaa CSR sum aṭanga hmuh a ni.

Pawisa an man

Assam Rifles sipaite chuan May 7, Ningani khan Zawngling, Siaha district-ah India mi pakhat leh Myanmar mi pahnih hnen aṭangin pawisa Rs 54,35,000 an man. Pawisa leh mi pathumte hi Tuipang Police Station-ah hlan niin, thubuai ziah luh a ni.

Larsap nen inkawm

Governor Gen. VK Singh leh BJP Mizoram Pradesh president Dr K. Beichhua, MLA te chu May 7, Ningani tlai khan Lok Bhavan-ah an inkâwm. Dr K Beichhua hian fûr ruahtui thleng tur atan inbuatsaih ṭhat a ṭul thu te, inkalpawhna kawngpuite fûr laia a pin loh nan tun aṭanga hmalak a ngaih thu te, fûrah harsatna lian tham mipuiin an tawh loh nan leh lei min theihna hmun, mihring tana hlauhawm theite enfiah a ṭul thute a thlen.