World Red Cross Day hman a ni

Nimin kha World Red Cross Day a ni a; he ni pual hian Disaster Management & Rehabilitation department, Indian Red Cross Society, Mizoram Taxi Association leh Shalom Society te chuan Aizawlah an hmang a; DMR minister Prof. Lalnilawma'n taxi driver chhuanawm thlan chhuah mi pali hnenah chawimawina a hlan.

Prof. Lalnilawma chuan, Mizorama a vawi khatna atana World Red Cross Day hman a ni chu a lawm thu sawiin, "Mi dangte tana inpekna hi mihringte nihphung ropui tak a ni a, World Red Cross Day kan hmanna hi Mizoramin bung thar a kaina tur a ni," a ti a; taxi driver-te chu Mizoram hmêl tilangtu an ni tih inhre reng turin a chah.

Inkhawmah hian Mizoram Taxi Association member, an eizawnnaa chhuanawm bika thlan mi pali - Vanlalhruaitluanga, Bethlehem Vengthlang, P Lalpianmawia, Bethlehem Veng-thlang, PC Lalhruaitluanga, Bethlehem Veng leh Zonunsanga Varte, Khatla South te hnenah chawimawina hlan a ni a; IRCS, Mizoram State Branch-in MTA member-te tan first aid training an buatsaih.

World Red Cross Day hi khaw-velah kum tin hman ṭhin a ni a, kumina thupui chu 'United in humanity' tih a ni.