Union MoS-in Kolasib-ah official-te a kâwm

Union Petroleum & Natural Gas leh Tourism enkawltu minister of state Suresh Gopi chuan April 7, Ningani khan Kolasib DC conference hall-ah Kolasib district-a sorkar department hrang hranga hotute (head of office)-te a kâwm.

Suresh Gopi chuan, ram hmasawnna tura chhiarpui (census) neih pawimawhzia sawiin, "Chhiarpui hi mipui dinhmun leh nihna dik tak hriat chianna a nih avangin, ram hmasawnna tura sorkar rua-hmanna siam nan a pawimawh em em. Mizoramin inkalpawhna ṭha zawk, a bikin rêl kawng ṭha tak a nei mek hi a lawmawm. Kawl-phetha kan mamawh ang kan inphuhrûk theih nan hydro electric project tam zawk neih theih dan ngaihtuah a pawimawh," a ti.

Zirna lam pawimawhna sawiin Minister chuan, "Kendriya Vidyalaya (KV) neih a pawimawh. Mizoram pumah KV pakhat chauh a awm hi a pawi ka ti a, KV a tam zel theih nan MP-te hnenah thlen ni se. Hmeichhiate zirnain ram hmasawnnaah kawngro a su. Nursing lamah pawh tam zawka an kal theih nan hmalak a pawimawh. Basic fundamental education leh school education-in naupangte nuna kawngro a su thui hle," a ti a; quality leh standard a ṭhat phawt chuan naupangte'n sang tak an thlen theih thu a sawi.

Suresh Gopi chuan, Mizoram chu leilung ṭha tak leh thlai ṭha tak tak thar theihna a nih angin, horticulture leh agriculture lama tharte chu ram páwn thlenga thawn chhuah a nih theih nan theihtawp chhuaha hmalak a pawimawh thu a sawi bawk.

Kolasib-a sorkar official-te chuan an department hnathawh dan tlangpui leh an mamawhte Union Minister hnenah hian an thlen. Inkawm zawhah Suresh Gopi hian Bukvanneia Oil Palm Mill a tlawh a, oil palm chingtute nen an inkâwm a ni.