UNNATI scheme chungchang inhrilhfiah

Commerce & Industries department leh sorkar laipuia Department for Promotion of Industry and Internal Trade (DPIIT) chuan nimin khan Royale Lalawi Hotel conference hall-ah UNNATI scheme-in a tumte inhrilhfiahna an buatsaih a, Commerce & Industries minister F Rodingliana'n a hmanpui.

F Rodingliana chuan, Mizoram leilungin a zir tâwk loh avangin hun rei tak chhung investor-te'n Mizoramah luh an hreh ṭhin niin a sawi a, "He harsatna hi KMMTTP-in a thlak danglam mek a, international border thui tak kan neihte hi a hlutna hre tur leh hemi behchhan hian UNNATI hmang ṭangkai thiam a, investor tam zawk hîp lut thei tura ṭan kan lak a ngai," a ti.

UNNATI hnuaia inziak lut an tlem lutuk chu pawi a tih thu sawiin CI Minister chuan, "Sorkar laipuia thuneitute pawhin awlsam zawka inziah luh a, mi tam zawkin scheme hi an hman ṭangkai ngei theih nan a process tiawlsam se ka duh," a ti a; UNNATI registra-tion pawm tawh mi pasarih hnenah UNNATI registration certificate a hlan.

DPIIT director Rajesh Panwar chuan, Mizorama investor-te leh entrepreneur-te tan an inhawn thu leh zawhna leh harsatna an neih apiangte chu chinfelsak an inhuam thu a sawi a; UNNATI-in a huam lo a nih pawhin sorkar scheme-te zir chiang a, hamṭhatna an dawn theihte hre tura hma la ṭhin turin kal khawmte a chah.