Court lehkha lem hmanga jail táng chhuahtir mi 17 zinga 12 man tawh

Lunglei District Jail-a tangte an chhuah theihna tura court lehkha lem siamtu mi pahnih chu jail-ah an táng mek a; lehkha lem hmanga táng chhuahtir tawh mi 17 zinga 12 chu man leh tawh an ni.

Mizoram Police chuan thuchhuah siamin, court lehkha lem hmanga Lunglei District Jail aṭanga táng chhuahtirte chu mi 17 an ni a; January 30 - March 18, 2026 inkara chhuahtir an ni. Naupang kumtlinglo laka pawi khawih kaihhnawih (POCSO Act) leh ruihhlo kaihhnawih (NDPS Act) thubuai leh rûkrûk thubuaia thiam loh chantir tawhte an ni. Mi 17 zinga mi 12 chu man an nih tawh a, mi pakhat a thi tawh a, mi dang pali chu an chin hriat a la ni lo.

Police tarlan danin, Court lehkha lem siamtu ber Jeremia Lalthangtura (25) s/o James Lalzawmmawia, Zemabawk, Berawlui Veng, Aizawl leh a thurualpui C Laltlanhlua (31) s/o C Lalbiaksanga, Republic Vengthlang te chu May 1, 2026 khan man niin, May 7, 2026 khan Lunglei Dictrict Jail-ah dah luh an ni. C Laltlanhlua hi Lunglei District Jail-ah ambulance driver hna a nghet loa thawk a ni.

Police-in an chhuinaa a lan danin, Jeremia Lalthangtura hian mi 17-te chu an thubuaiah appeal a siamsak theih thu leh a hmelhriat ukil a biaksak tur thu a hrilh a; a buaipui manah pawisa a la ṭhin a, pawisa chu C Laltlanhlua nen an insem ṭhin. Mi pakhat hnen aṭangin Rs 4,000 aṭanga Rs 50,000 inkar an la a, pawisa chu Gpay leh pawisa fai (cash)-in C Laltlanhlua hnenah an pe ṭhin a; Rs 1,35,000 vel an dawng hman.

Jeremia Lalthangtura hian court lehkha lemte chu hmun pahnih - Lunglei Rahsi Venga xerox leh printing tih theihna computer dawr pakhatah leh Lunglei District Jail office computer-ah te a siam ṭhin tih finfiah a ni. C Laltlanhlua'n District Jail office chahbi a dil chhuak a, Jeremia-a'n computer-a document lem a siam laiin a lo veng ṭhin. Lehkha lem an siamte chu C Laltlanhlua'n jail thuneitute hnenah a pe ṭhin a, jail thuneitute chuan order lem a ni tih hre loin tángte chu an lo chhuah mai ṭhin a ni.

Court lehkha lem siamna atana Jeremia Lalthangtura'n a hman computer leh printer te chu Forensic Science Laboratory-ah enfiah tura thawn a ni a; thubuai hi chhui chhunzawm mek zel a ni.

He pawikhawihna chungchangah hian Lunglei District Court-a District & Sessions judge R Lalduhawmi'n April 27, 2026 khan Lunglei Police Station-ah first information report (FIR) a thehlut.